Наргиз Гюлечова
Республикайин дережа
Гьаму йигъари Мягьяч-гъалайиъ А. Карповдин ччвурнахъ хъайи шахматарин клубдиъ жюрбежюр яшарин живанарин ва шубарин арайиъ урус шашкйириан Дагъустандин первенство кIули гъубшну. Турнириъ Мягьячгъала, Каспийск, Кизилюрт шагьрариан ва Табасаран, Хасавюрт ва Казбек районариан 30-тIан артухъ спортсменар иштирак гъахьну.
Табасаран райондиан талитариъ, Ягъдигъан вуйи, сач республикайин чемпион гъахьи 17 йис дубхьнадру живанарин категорияйиъди Мадина, цци Табасаран райондин первенствойин гъалибчи, 11 йис дубхьнадру живанарин категорияйиъди Мадинайин чве Мугьяммад Гьясанбеговар, ва гьацира сач республикайин турнириъ пешкешнан йишвар гъадагъу Хючнаан вуйи Альфия Ражабова ва Гъазимягьямед Гьяжимурадов иштирак гъахьну.
Чпин категорйириъ Ягъдигъарин 1-пи нумрайин мектебдин 3-пи классдиъ урхурайи Мугьяммад ва 8-пи классдиъ урхурайи Мадина Гьясанбеговар кьюбридра 3-пи йишван сагьибар гъахьну.
Райондин дережа
Гьар йисан майдин эвелиан 9-пи йигъазкьан Табасаран райондиъ спортдин жюрбежюр жюрйириан райондин дережайиъди турнирар кIули гъягъюра. Гьадрарин арайиъ футболиан, волейболиан, юкьяр дисбаан ва гь. ж.
Волейбол
1-пи майди Бухьнагъ гъулаъ, Ватандин Аьхю дявдин Гъалибвалин 79-пи йисаз бахш вуди, Халагъ ва Гуми поселенйирин арайиъ волейболиан турнир кIули гъубшну. Турнириъ гьаму поселенйирианси, Жулжгъарин поселениейиз дахил шулайи Гьесихъ гъул’анра кади, 10 командйир иштирак гъахьну. Натижайиъ сабпи йишван сагьиб Жвул’арин, кьюбпи йишван сагьиб Гьесхъарин командйир гъахьну, шубубпи йишв Гувлигъ гъулан командайи гъадабгъну.
Турнир кIули гъабхуз спонсорвалин кюмек тувур Халагъ гъулан агьали Назим Гьямзаев ву.
Юкьяр дисуб
4-пи майди Кьалухъ Мирзайин ччвурнахъ хъайи спорткомплексдиъ живанарин арайиъ юкьяр дисбаан Табасаран райондин талитар кIули гъушну. Талитариъ 17 гъагъишнан категорйириъ вуйи 150-тIан артухъ спорт-сменар иштирак гъахьну. Уьмуми гьисабариинди, командйирин арайиъ 1-пи йишв Гурихъ гъулан спортсменари (тренер Мурад Аьзизов), 2-пи йишв – «Олимп» командайи (тренер ТIагьир Нуров), 3-пи йишв – «Спорткомлекс» командайи (тренер (Закир Гюлов) гъазанмиш гъапIну.
Футбол
2-пи майди Табасаран райондиъ футболианра турнир ккебгънийи. Талитариъ иштирак хьуз райондин гъулан поселенйириан 12 командайи аьрзйир тувну.
Натижайиъ 3-пи йишван сагьиб Гюгьрягъ гъулан команда гъабхьну. Финализ удучIву Гурихъ ва Ягъдигъ гъуларин командйирикан ужуб гьязурлугвал ва гъалибвалихьна артухъ гьевес ягъдигъари улупнийи. Дурар футболиан райондин чемпионар гъахьну.
