Гьаму гьяфтайи Дагъустандиз РФ-дин экономикайин артмиш’валин министр Максим Решетников, дугъан заместителар, федеральный бязи жара идарйирин вакилар гъафнийи. Федеральный министри Дагъустандин глава Сергей Меликовдихъди республикайин яшайишдинна экономикайин артмиш’валин месэлйирикан вуйи совещание гъубхну.

Совещаниейиъ Дагъустан Республикайин энергетикайин ва ЖКХ-йин карханйир мюгькамди артмиш хьпан программа уьмриз кечирмиш апIбан, коммунальный ва энергетикайин инфраструктура къайдайиз хпан, Урусатдин Федерацияйин гьюкуматдин программйир ва милли проектарин дакьатар ишлетмиш апIбан, Каспий гьюлин гъирагъдин кластер артмиш апIбан месэлйир гъитIирккнийи. Федеральный министри къайд гъапIганси, аьхиримжи йисари Дагъустандиъ экономика ужуди артмиш шула.
«Гъубшу йисан экономикайин асас цирклари – гъулан мяишатди, тартиб апIбан карханйири, туризмди – ужудар натижйир улупну. Инвестицйир артухъ шули шубудпи йис ву. Гъубшу йисандин натижйириинди республикайин экономикайиз дуфнайи инвестицйирин кьадар 8,3 процент за гъабхьну», – гъапну Максим Решетниковди.

Дагъустанди «прорывной» ччвур тувнайи проектариз 60 миллиард манаттIан артухъ инвестицйир жалб гъапIну.
Региондиз деебтурайи кюмек яваш шуладар. Максим Решетниковди гъапиганси, багарихьди гъюру 3 йисандин арайиъ СКФО-йин субъектариз, туриствалин циркил артмиш апIбан бадали, 1,5 миллиардтIан артухъ пул деебтиди.
Республикайиз дуфну имиди, Решетников Казбеков райондизра ва Къизил шагьриз гъушну ва ерли туриствалин объектарихъди ва котельнйир тикмиш апIбан ляхнарихъди таниш гъахьну.