Наргиз Гюлечова
2023-пи йисандин ккудушу 9 вазлин арайиъ республикайиъ 70 миллионкьан кIул мал-къарайиз, пеэр-шюхъяриз жюрбежюр уьзрариз аькси вуйи прививкйир гъивну ва гьацира 5 миллионкьан кIул мал-къарайик ва пеэр-шюхъярик кайи уьзрар ахтармиш гъапIну. Мидин гьякьнаан улихьнаси Дагъустан Республикайин ветеринарияйин комитетдин кIулиъ айи Мягьямед Шапиевди пресс-конференцияйиъ мялумат тувну.
«Гьисабназ гъадагъурайи вахтнан арайиъ республикайин ветеринарияйин гъуллугъчйири, региондиъ эпизоотический аьгьвалат ужи апIбан бадали, хайлин ляхин дубхна. Дагъустандин мал-къара пис уьзрарихъди иццру дархьбан метлеб ади кьабул апIурайи уьлчмйирин кюмекниинди гьяйванатарик кивру ящур, сибирин язва, африкайин чума ва яшайишдинна экономикайин артмиш’вализ ва сурсат экспортдиз гьапIувализ зарар тувру уьзрарихьан вахтниинди уьбхюз гъабхьну.
Эгер Кафари Кавказдин вая Кьибла федеральный округдин саб республикайиъкьан мал-къарайик ящур уьзур кивиш, гьадму зонайин гьич саб региондианкьан экспортдиз я йиккун, ясана тахилин сурсат гьапIуз ихтияр тувудар. Гьаци, думу региондин базрариъра йикк масу тувуб гъадагъа апIура», – гъапну комитетдин кIулиъ айири. Дугъан гафариинди, гьаму йисан республикайин эпизоотический аьгьвалат пис хьпаз аькси ляхин гъабхбан комиссияйин кьюб заседаниейиъ республикайин хулан гъушарик кивру грипп ва чарвйирик кивру жигьири уьзрар региондиъ тарарагъбан бадали, лазим вуйи уьлчмйир кьабул апIбан месэлйир гьял гъапIну. Мидихъди сабси РД-йин Правительствойин председателин заместитель Аьбдурягьман Мягьмудовдин регьберваликкди республикайин агьалйирик бруцеллез уьзур кубчIвбан улихьишв гьадабтIбан меселйириз бахш вуйи заседание гъабхьну.
«Мал-къарайик кивру уьзрарикан улхури пуз ккундузузки, му терефнаан республикайиъ айи аьгьвалат читинуб дар, аммаки гъийин йигъаз чарвйирик кивру жигьири уьзур тарабгъруваликан цIиб хатIа ка. Учуз айи мялуматариинди, гьамусяаьт гъунши регионариъ (Калмыкияйиъ, Ставрополь крайдиъ, Ростов, Астрахань ва Волгоград областариъ) му уьзур чарвйирик кивна», – гъапнийи Мягьямед Шапиевди.
Пресс-конференцияйиъ Мягья-мед Шапиевди журналистариз республикайиъ гьуркIну маларин духтрар адруваликан ва жигьилариз му кесп ктабгъуз даккниваликан гъалаб кади ктибтнийи. Дугъан гафариинди, гъийин йигъаз республикайиъ айи маларин духтрарин кьадар 47 кас ва фельдшерар 57 кас ву.
«Гъи мектеб ккудубкIу баяр-шубариз гъулан мяишатдиъ игьтияж айи кеспнан эйсйир хьуз ккунди адар. Ав, заан образование ибшри кIури, урхуз гъягъюра, аммаки ляхин апIуз ккундар. ЦIийинаси дарди, гьамусяаьт маважибра за дапIна, вушра цирклиъ ляхин апIру касар цIибтIан адар», – аьлава гъапIну Мягьямед Шапиевди.
