Зубайдат Шябанова
Дагъустандиъ Палестинайиан гьергну гъюрайи 200 урусатдин ватандашариз йишвар гьязур дапIна. Мидин гьякьнаан РД-йин правительствойин председатель Аьбдулмуслим Аьбдулмуслимовди хабар тувну. Магьа гьаму киш, элгьет ва итни йигъари Дагъустандиъ 150-рихьна Палестинайиан шубуб дестейиинди гьергну дуфнайи инсанар кьабул гъапIну.
Элгьет йигъан Мягьячгъала шагьрин вокзликкна кьюбпи десте кьабул апIуз Аьбдулмуслим Аьбдулмуслимов ва гьацира МЧС-дин вакилар, психологар, духтрар гъафнийи.
Жумартвал
Палестинайиан сабпи дестейиъди Дагъустандиз гъафи Мугьяммад Наджийи дагъустанлуйирин хяларихьна вуйи мани янашмиш’валикан ва иллагьки чпихьна вуйи гьюрматнакан, хатир уьбхбакан, уж’валнакан ктибтнийи тяжублуди Сектор Гъазайиъ му духтирди лихурайи, Хха гьамус думу чан ватандиан Дагъустандиз гъюрайи кьюбпи дестейин дахилнаъди дуфнайир ву.
«Учу Урусатдин самолетдиъди дявдиан адагънийи. Сифте Москвайиз, хъа гьадушв’ан Дагъустандиз гъахунчу. Дагъустандин агьалйири учу лап маниди кьабул гъапIунчу, хъа ичв халкьдин хялар кьабул апIувалин аьдатари узу лап мюгьтал гъапIунзу. Дагъустандин халкьар рягьимлудар, жумарт юкIв айи мерд инсанар ву.
Дагъустандиз гъафи садпи йишван учу, дурцну хъадахьнайидар, архаин йишв гъибихъубси, дишла нивкIуз гъушунчу. Учуз жара гъапIу хулариъ марцциди ва маниди вуйи. Мани ва мичIли шидра а. Ицци хурагарра гьивунчуз. ВаритIан асасуб – инсанарин рафтарар ву. Учу варидариз аферин ва баркаллагь кIурача», – гъапну Мугьяммад Наджийи.
РД-йин бицIидарин ихтиярар уьрхбан тешкилатдин кIулиъ айи Марина Ежовайи къайд гъапIганси, Палестинайиан республикайиз дуфнайи бицIидариз психологияйин кюмек тувди. Хъа имбу месэлйир, гьадму гьисабнаан гьергну дуфнайидар ляхнарихъди тямин апIбан, бицIидар мектебариъ урхувалин гьякьнаан ва гь.ж. Дагъустандин правительствойи гьял апIиди.
Дяви дар…
Палестинайиан Дагъустандиз гъафи Альхаджаль Халили ва Халид Аваддира ихь ватанагьлийириз чухсагъул кIура.
«Гизаф миллетар айи урусатдин халкьдиз чухсагъул! Ич рякъ кьадарсуз гъагъиб гъабхьнийич. Гьамусяаьт Палестинайиъ гъябгъюрайи дяви дяви дар, думу халкь терг апIувал, дагъитмиш апIувал ву. Хьуд агъзуртIан артухъ бицIидар гъийихну, агъзрариинди инсанар ахьнайи хуларикк кками. Дявдиз улихьна учу кьюриддира урус шубарихъди хал-хизан ккебгънийча. Мина гъюруган, учухъди ич баркаллувалин хупарра хъачухъ. Учу маниди кьабул апIбаз Дагъустандиз чухсагъул! Учухьна вуйи гьякь-гьюрмат ва кюмек апIуз ккунидарин кьадар рябкъюри, ич гьиссариан юкIв мухриъ убшрадарич», – кIура дурари.
Ялгъуз саб рякъ
Дявдин цIигъян гьергуз гъабхьи духтир, акушер-гинеколог Ольга Зоробара къурху гьядисйирин шагьид гъахьну.
Ольга Сектор Гъазайихьан кьибла терефнаъ айи Хайи-аль-Наср райондин больницайиъ лихурайи. Ракетйир больницайихьнакьан гъюрайи. Саб ракета дараматдиз гъивубси, Ольгайи, чан бицIину байра гъадагъну, Египетдианмина Урусатдиз гьергну гъюз кьаст апIуру. Дяви ккебгъубси, Израили чан уьлкейиан удучIвру гюзчивал гъабхру ва инсанар деетру вари пунктар хъяркьнийи ва Палестинайиан жара гьюкуматариз удучIвуз шлу рякъ анжагъ Рафах шагьриътIан гъибтундайи.
«Рафахдиз гъягъюз лап читинди вуйи. Саб йишваъра я бензин, я солярка адайи. Ич машиндин бензин кьяняаьт апIуз, бицIи байра хъади, больницайиъ гъузри гъахьунза. Ич хул’ан больницайиз 30-тIан артухъ километрин манзил а. Больницайиина ракетйир деетуз хъюгънийи. Фуж сагъди имиш, фуж амдарш, гьамусра хабар адарзуз. Вари халкь дагъитмиш апIура. Душваъ айи гьарай-фигъан, ишуб-суза ебхьруган, аьх апIуз шулдар. Жилири сифте узуна бай Египетдин гъвалахъ хъайи Рафах шагьриз гъахну. Рафахдиз хъуркьруган, машиндихъ бензиндин цIадлартIан хъамдайи.
Шаду нивгъар
10-пи ноябриъ Египетдиз Урусатдин МЧС-дин самолетар гъафну. Учу «Рафах» КПП-йилан улдучIвуз нубатнахъ дийигънайча. Я думу йигъан, я хъайигъан раккнар тIаундайи. Аьхирки, элгьет йигъан учу деетруваликан гъапнийи. Сифте Египетдин ватандашар алдауз хъюгъю, хъасин США-йиан ва Англияйиан вуйидар, хъа дурарин кьяляхъ Урусатдин ватандашар. КПП-йин Египетдин терефнаъ Урусатдин пайдагъ ва учу къаршуламиш апIурайи МЧС-дин вакилар гъяркъган, улариан гъягъюз хъюгъю шаду нивгъар дерккуз шулдайчухьан. Узухъди гъюрайи хайлин ихь ватандашар фалиж кабхъри, гъалабулугъвалиъ ахъри гъахьну. Палестинайиъ гъябгъюрайиб сагъи фикир айи касарихьан я аннамиш апIуз, я аьх апIуз шлуб дар. Йиз жилирра духтир ву. Учу КПП-йиин гъитну, думу учв Гъазайиз кьяляхъ гъушну. Хайлин ич дустар, таниш касар хизанариинди гъийихну. Аьхюну пай инсанар ракетйир уьлюрхну ахьнайи хуларин гъванар-цаларикк ккахьну ими.
Аьхюну кьюр велед Урусатдиъ урхурайич. Йиз дада Чебоксары шагьриъ яшамиш шулайиз. БицIину бализ урус чIал аьгъдар. Думу аьраб мектебдиз тувурза. Аьхиримжи шубуб вазли Палестинайиъ учуз маважиб тувру шартIар ади гъахьундайи. Урусатдиъ йиз пишекарвалиан переаттестация дубхну, ляхин абгуз хъюгъюрза», – ктибтура му дишагьлийи.
Ольгайи чан пишейиъ гъузуз кьаст гъапIну. Духтир-акушерди думу 20 йисантIан артухъ лихура. Кьюрид аьхю баярра адашдинна дадайин рякъюъди гъушну. Аьхюнур Москвайиъ духтир ву. Хъа кьялану бали Н.И. Пироговдин ччвурнахъ хъайи медуниверситетдиъ ужудар аьгъювалариинди урхура.
«Узуз Палестинайиан гьергну гъюрайи ихь вари ватанагьлийирин терефнаан Рамалла шагьриъ айи Урусатдин посольствойиъ лихурайи ихь дипломатар Кристина Дарковайиз ва Илья Литвиновдиз баркаллагь пуз ккундузуз. Дурари лап аьхю ва важиблу ляхин гъабхура. Игитар гьацдар шул», – гъапну Ольга Зоробайи.
Сабвал
Шубуд йигъандин арайиъ Сектор Гъазайиан Дагъустандиз 147 кас гъахну. Дурарикан 77 бицIидар ву. Дурар гьамусяаьт Мягьячгъала шагьрин багарихь вари шараитар айи санаторияйиъ а.
Урусатдин харижи ляхнариз лигру министерствойиан мялумат тувганси, Палестина гьюкуматдин аьтрафариин али Сектор Гъазайиъ яшамиш шулайи, душв’ан 900 ихь ватанагьлийирикан 558 кас адагъуз гъабхьну.
Урусатдиз гьергну гъюрайи Палести-найин вакилар Дагъустандилан гъайри, Калужский областдиъ, Башкирияйиъ, Чечен республикайиъ ва жара регионариъ кьабул апIура.
