Зубайдат Шабанова
Ноябрин аьхиримжи йигъан йишвну Дербент шагьриъ гьюкуматдин Табасаран драмтеатрин сабуну цал гьадабхъну. Аьхю бахтнаанси, думу вахтна багарихь сар касра хьадайи. Цал абхъру вахтна, театрин коллектив Расул Гьямзатовдин «Асият» пьесайиан вуйи премьера хьади Кьибла-Сухокумск шагьриз душнайи, ва гьаддиз театрин кллективдикан саризра хатIа гъабхьундар.

Гьамусяаьт театр Пашабеговдин ччвурнахъ хъайи кючейиъ ерлешмиш дубхьна. Дараматдиъ гъузуз аьхю хатIа а, фицики имбу цаларра ахьуз мумкин ву.
Сар-кьюд йис улихьна дарамат аварийный гьисаб дапIнайи ва дидин расвалин ляхнарихъ 2020-пи йисан хъюгънади ккундийи. Хъасин дарамат цIийиб дивбан къарар алдабгъну, ва республикайин бюджетдиан думу ляхнариз 11,7 миллион манат дакьатар жара апIуз пландик кипнийи. ЦIийи дарамат дивуз уьмуми гьисабариинди, 235 миллион манат харжар удучIвурайи.

Амма 2020-пи йисан ковиддин тIягъюн тарабгъувалихъди аьлакьалу вуди, дакьатар гьуркIри адрувалиан театрин тикилишчивалин ляхнар ккергъундар. Гьаддихъанмина Табасаран драмтеатриз цIийи дарамат дивбан месэла гьар ражари ярхлаз илдипура.
«Республикайин телеграм-кана-лариан сабдиъ табасаран дратеатрин цал абхъну кIури, шикилра хъади, мялумат тувра. Дарамат, дугъриданна, аварийный гьисаб дапIну, хайлин йисар вуйи.

Къайд апIуз ккундучуз, артистар душваъ лихурадар. Министерствойин къарарниинди репетицйир Лезги театриъ гъахура.
ЦIийи дарамат дивбаз проектдинна сметайин кагъзар гьязур духьна. Дурарин гьюкуматдин экспертизара гъубхну. Думу проектдин кагъзар Республикайин 2024-пи йисан бюджетдик вая 2025-2026-пи йисарин пландик кипуз РИП-диз хъадаъна», – гъибикIну му гьядисайин гьякьнаан РД-йин минкультурайин телеграм-каналиъ.