Зубайдат Шябанова

2017-пи йисан Табасаран райондин думугандин глава Алаудин Мирзабалаевди райондиъ дишагьлийирин аьхю форум тешкил гъапIнийи. Форумдиз саки вари республикайиан жямяаьтлугъ вакилар, игит бабар, далу терефнан зегьметкешар, жюрбежюр гъуллугъариъ айи гьяким дишагьлийир уч гъахьнийи. Гьадмуган кIули гъубшу серенжемдиъ Табасаран райондиъ дишагьлийирин союз ачмиш апIбан къарар адабгънийи, ва Кюрягъ гъулан мектебдин директорин заместитель Айханум Рашидова (шиклиъ) думу союздин регьберди ктагънийи. Дидхъанмина саки 9 йис гъубшну.

 

Бязи касари думу союз фтиз лазим ву кIури, фикрар апIузра мумкин ву. Жара муниципалитетариъ айи жямяаьтлугъ тешкилатариси, Табасаран райондин дишагьлийирин союздира швнуб-саб важиблу ляхин кIули гъабхура. Гьадму гьисабнаан райондин дишагьлийирин ва дурарин хизанарин маракьар ва ихтиярар уьрхбан, юридический ва яшайишдин цирклиан кюмек тувбан, уьмрин гъагъи аьгьвалатнаъ ахъу дюшюшариъ кюмекнан хил гьачIабккбан, багъри райондин культура, аьдатар, чIал уьбхбак ва артмиш апIбак пай кивбан, жигьиларихъди ляхин гъабхбан, рягьимлувалин акцйир тешкил апIбан ва гьацира жара серенжемар ктухуз шулу. Мидланра гъайри, думу тешкилатди хусуси метлеб айи дявдин операцияйиъ айи эскрарин хизанариз кюмек тувбан серенжемар сабпи йишв’ина адагъна.
Гьаму йигъари узу Табасаран райондин дишагьлийирин союздин кIулиъ айи Айханум Рашидовайихъди сюгьбат гъапIунза.
– Учу Табасаран райондиан хусуси метлеб айи дявдин операцияйиъ иштирак шулайи эскрарин абйир-бабарихьна, уьмрин гъагъи аьгьвалатнаъ ахьнайи хизанарихьна улукьуз гъягъюри, дурариз учхьан шлу кюмек туври шулча. Мисалназ, ихь ватандашари сабпи сентябриз касибвал кайи хизанарин бицIидариз мектебдиъ ишлетмиш апIру шей’арин кюмек тувуб аьдатнаъ абхъна. Учу думу кюмек волонтерарихьди гьарсар бицIирихьна рубкьуз гъитрача. Гьацира швнуб-саб ражари хусуси метлеб айи дявдин операцияйиъ айи ихь эскрариз дармнарин, ликариин алахьрударин, ипIру сурсатарин кюмекар хътаунча.

Мидланра савайи, Бухьнагъ гъул’ан вуйи дишагьли Сар’ят Мягьямадовайи ихь эскрариз гапар ва мани атIнар урхуз саб шишал хьайин мурслар тувну. Гьадму мурсларикан Кюрягъ гъул’ан вуйи бабар, зегьметнан ветеран Шекер Муртазаевайи (думу улихьна йисан кечмиш гъахьну, гунгьарин аьфи апIри чан), Гевгьер Пирмягьямадовайи ва Хатун Аьгьмадовайи ихь эскрариз хайлин мани ацIу атIнар гъурхнийи. Узу, ихь ватанпервер жямяаьтлугъ кас Айваз Рамазанов ва райондин администрацияйин вакилар гьар йисан хусуси метлеб айи дявдин операцияйиъ 3-4 ва артухъ веледар айи бабариин пешкешарра хьади улукьуз гъягъюри шулча. Ццира, 23-пи феврали, райондин 4 хизандихьна гъягъюз ният айич.
Учухьна ихь дишагьлийир асас вуди медицинайин цирклиан, газран мяишатдихъди аьлакьалу месэлйир гьял апIуз кюмек ккун апIури гъюру. ИкибаштIан, учу гьарсари бабан дерди гьял апIру рякъяр агурача, – гъапну Айханум Рашидовайи.
Къайд апIуз ккундузуз, райондин администрацияйин кIулиъ айи Мягьямед Къурбановди райондин дишагьлийирин союздин жягьтлуваларин тереф аьшкьниинди уьбхюруа ва, дурар кIулиз удучIвбан бадали, чахьан шлу кюмек тувра.

Йиз фикриан, дишагьлийирин жямяаьтлугъ тешкилат райондиъси, гьарсаб аьхю гъулаъра ади ккунду. Бязи дюшюшариъ дишагьлийирихьан чпин кIваъ айи дерд дишагьлийизтIан ачухъ апIуз шулдар. Узу гъи баяр кечмиш гъахьи бабарикан, жиларихъ мягьрум гъахьи вая жилирихьан гьудучIву дишагьлийирикан ва гъагъи аьгьвалатнаъ ахънайи шубарикан кIураза. Дурарин кIваъ аьхю гъагъ а. Хъа хайлин дюшюшариъ дурари кIваъ айи гьарай ачухъ апIуз шлу ва чпин гаф ебхьру кас агури шулу. Шлиз вушра гаф пуз шулдар. Хъа гафнан сир уьбхрурра агуб читин ву. Ужуб гафну гъван гъюдли апIуру, мани гафну миркк ебцIуз гъитру, кIура абйирин мисалариъ Табасаран район аьхюб вуйивализ лигну, дишагьлийирин союздин регьбер Айханум Рашидовайиз варидариин улукьуз мумкинвал шуладар. Дишагьлийирин союздилан гъайри, Табасаран райондиъ «Бабарин кьувват» тешкилатра гьяракатнаъ а. Думу хусуси метлеб айи дявдин операцияйиъ кечмиш гъахьи эскрарин бабарин десте ву. Хусуси метлеб айи дявдин операцияйихъди аьлакьалу месэлйир гъахьиган, дишагьлийир асас вуди гьадму тешкилатдизра илтIикIуру.
Айханум Рашидовайиз деврин дишагьлийири жямяаьтлугъ уьмриъ гъабхурайи роликанра суал тувнийза.
«Гьамус дишагьлийир хайлин улихь душна. Дурар аьхю жавабдарвалиинди чпи апIурайи ва кIули гъабхурайи ляхнарихьна янашмиш шула. Узуз заан гъуллугъариъ айи хайлин табасаран дишагьлийир таниш вузуз. Гьам республикайиъ, гьамсана Урусатдин аьхю шагьрарин зурба карханйирин кIулиъ ашра, ихь дишагьлийири намус-гъир’ят уьбхюра», – гъапнийи дугъу.
Гьаци вуйивалин узура шагьид шулаза.