Мейлан Нежефов

Украинайин жилариин гъябгъюрайи хусуси метлеб айи дявдин операцияйин иштиракчйир Мавзудин ва Радмила Аьбдулаевар жикъи вахтнан отпускдиз багъри райондиз дуфна.

 

Хив райондин глава Ярмет Ярметовди ва райондин депутатарин собраниейин председатель Садикь Къафаровди райондин администрацияйин ва агьалйирин терефнаан хяларихъди мани гюрюш кIули гъубхнийи. «Ичв улихь ужуйи улупуз, ясана, аьхю гаф хьуз кIурайиб дариз. Дугъриданра, учвусдар ватанперверар гъи тIубарииндитIан гьисаб апIуз даршул. Фицики, учву багъридарихьанси, жвуву гъахи веледарихьанра ярхла ади, гъаних душмнихъди женгнаъ учIвнача. Радмила ва Мавзудин, узу учвуз инсанвалин чухсагъул мялум апIураза. Ичв хизандин ватанпервервалин гьисснан ирс ичв веледаризси, вари аьламдизра нумуна хьибди. Учву, уьмрин юлдшар, яд уьлкейиъ имбукьан гагьди, ГъуштIларин гъулаъ айи багахьлуйириз алахьурайи читин суалариз райондин администрацияйин терефнаан вуйи ва удукьру кюмек тувуз гьарган гьязур вуча», – гаф тувнийи райондин глава Ярмет Аьлиметовди.

Гюрюшдин аьхириъ Ярметовди райондин администрацияйин терефнаан игит хизандин кIулар Радмила ва Мавзудин Абдуллаевариз чухсагъул мялум апIбан кагъзар тувнийи.
Мавзудин Аьбдулаевдира чан терефнаан, швнуб-саб ражну райондиан гуманитарный гъагъ хътапIувализ аферин мялум апIури, райондин главаcи, гьарган гъахурайи ляхнариъ кюмекназ бакар шулайи райондин культурайин, спортдин, жигьиларин политикайин ва туризмдин кIулиъ айи Казбек Къазиев ва ич газатдин хусуси мухбир, Мажвгларин кьялан мектебдин завуч Мейлан Нежефов чпи гъуллугъ апIурайи частнан командованиейихьан чухсагъул мялум апIбан кагъзариинди лишанлу гъапIнийи.