Гюльнара Мягьямедова
5-пи сентябри Мягьячгъалайиъ Расул Гьямзатовдин ччвурнахъ хъайи 50-пи нумрайин мектебдиъ машгьур шаирин яратмишариз бахш дапIнайи, гьар йисан гъабхру «Лизи кьарнйир» ччвур тувнайи шиърар урхрударин конкурс кIули гъубшнийи. Думу конкурсди мектебариъ урхурайи, шаирин гьюрмат ва ирс уьбхюз ккуни баяр-шубар уч гъапIнийи.
Мягьячгъалайин мектебарин 9-11-пи классариъ урхурайи 200-дилан зиина баяр-шубар Расул Гьям-затовдин дерин мяна айи, багъри ругарихьна, чIалнахьна вуйи ккунивали, уж’валина инсанвали ацIнайи шиърар хьади удучIвнийи. Урус, авар, дарги, гъумугъ, лезги, лак, табасаран, харижи уьлкйирин чIалариинди жюрбежюр номинацйириъ шиърар гъурху баяр-шубари чпи поэзияйин гъавриъ айивал, шиърар урхувалиан чпиз айи устадвал улупнийи.
Конкурсдин гьарсар иштиракчийи чан урхбаъ шаири эсериъ тIаънайи гьиссар ачухъ апIури, дидиъ чан юкIв ивнайи. Баяр-шубари жюрийин вакиларин ва хъпехъуз дуфнайидарин юкIвариъ, дадайикан вуйи шиърарилан гъадабгъну, Ватандикан, кьисматнакан, дюн’яйин аьгьвалатнакан вуйи шиърар урхури, дерин ва чIиви гьиссар ачухъ гъапIнийи.
«Лизи кьарнйир» конкурс – му талит дар, му гафнан аьхю устаддихьна вуйи гьюрмат, жигьил наслиз чпин культурайин ирснан багахь хьуз, деврарин аьлакьа гьисс апIуз мумкинвал ву. Думу йигъан Мягьячгъалайин 50-пи нумрайин мектебдиъ шаирин ирс, йисариланра дугъан эсерарин аквнан важиблувал улупру поэзияйин аьхю машквар гъабхьнийи.
Мягьячгъала шагьрин образованиейин управлениейин методотделин кIулиъ айи Зулгьижат Аьбдулжелиловайи шиърар гъурхдарин ужуб гьязурлугвал, аргъаж шулайи наслариз поэзияйилантина ватанпервервалин, багъри чIалнан литературайихьна вуйи ккунивалин тербия тувбан чарасузвал къайд гъапIнийи.
Поэзияйин гьаму конкурсдиъ Мягьячгъалайин Алексей Сухановдин ччвурнахъ хъайи 57-пи нумрайин кьялан мектебдин 9-пи классдиъ урхурайи Сефият Мукаиловайи (шиклиъ) Расул Гьямзатовдин табасаран чIалназ илтIибкIнайи «Йиз Дагъустан» шиир аьхю устадвалиинди гъурхнийи. Конкурсдихьна думу гьязур гъапIур табасаран чIалнан дарсар киврайи мялим Мадина ТIаибова ву. Шуран урхбан устадвализ Дагъустандин А.А. Тахо-Годийин ччвурнахъ хъайи педагогикайин илимдинна ахтармишарин институтдин бабан чIаларин цирклин аьхюну гъуллугъчи Ширинат Жамалиева кIулиъ айи жюрийи заан кьимат дивну, ва ихь шуру конкурсдиъ сабпи йишв гъадабгъну.
Гъит, Расул Гьямзатовдин «Лизи кьарнйир» инсанарин юкIвар сатIи апIури, ислягьваликан, гьюрматнакан, инсандин рюгьнан утканваликан кIваин апIури, тIирхри.
Шикил «чIиви» апIбан бадали, ArSilica приложение телефондиз скачать дапIну, камера шиклиин алапIай, ва шуру шиир урхиди.
