Украинайин аьтрафариин гъябгъюрайи хусуси мяна айи дявдин операцияйин женгариъ дирбаш’вал улупбаз лигну Хив райондин агьали Ризван Рамалданов медализ лайикьлу гъахьну.

 

Ризван 1981-пи йисан 31-пи январи Хив райондин Лик’арин гъулаъ Сайид ва Бедержигьан Рамалдановарин аьхю хизандиъ бабкан гъахьну. Багъри гъулан бегьем дару мектеб ккудубкIбалан кьяляхъ, дугъу багахь ерлешмиш дубхьнайи Хирижв гъулан мектебдиъ 10-11-пи классарин аьгъювалар гъадагъуру. 2000-2001-пи йисари Ватандин улихь жвув’ин али эскервалин буржи намуслувалиинди кIулиз адабгъуру. Армияйин кьяляхъ хайлин йисари лихуз гъягъюри-гъюри, хизандин мадар апIури гъахьну.

2022-пи йисан 25-пи сентябриъ мобилизацияйин дахилнаъди думу хусуси метлеб айи дявдин операцияйиъ иштирак хьуз гъушнийи. Дугъахъди багъри гъул’ан Ферзяли Ферзялиевра хъайи. Гьяйифки, жюрэтлувал улупури, дугъахъди чвеси айи Ферзяли Ватан бадали дявдин майдандиъ талаф гъахьнийи. Гьадмуган Ризвандизра гъагъи зийнар гъахьну. Чпин улихь дивнайи месэлйир намуслувалиинди ва дирбаш’валиинди гьял апIбаз лигну, дурарин эскервалин гъуллугъназ командованиейи заан кьимат тувнийи. Ф. Ферзялиевдикан вуйи макьала «Табасарандин нурар» газатдиъ тувнийхьа. Магьа гьаму улихьнаси Ризван Рамалдановра «Дирбаш’вал улупбаз лигну» медалин сагьиб гъахьну.

Гъи Ризванди, рядовой званиейиъ ади, Каспийск шагьриъ гьюлерин пияда кьушмариъ гъуллугъ апIура. Ризванди чан уьмрин юлдаш Кумсият Шихсефиевнайихъди кьюр велед тербияламиш апIура.