Гюльнара Мягьямедова

23-пи мартди Дагъустандиъ мектебарин футболин лигайин республикайиъ гъябгъру пай ккебгъра. РД-йин илимдин ва образованиейин министерствойин РДЮСШ-йиъ гъягъру талитариъ сабпи ражари вуди шубарихьан иштирак хьуз шулу. Сад йигъандин арайиъ 24 командайигъян талитарин финалиъ иштирак шлу ужударсдар командйир гъядягъну ккунду.

 

Мектебарин футболин лигайин 2023/24 йисарин шубубпи пай Дагъустандин образованиейин идарйириъ урхурайидарин арайиъ 20-пи сентябриъ мектебарин айитI гъахру талитарилан ккебгънийи. Муниципалитетарин арайиъ талитар, 20-пи октябрилан ккергъну, кIули гъухнийи. Думуган республикайин дережайиъди гъягъру талитарин иштиракчи командйир гъядягънийи.

30-пи мартди, гвачIнинган сяаьт 10-диъ, Дагъустандин 52 муниципалитетдиан гъюру районарин ужударсдар командйир РД-йин мектебарин футболин лигайин 1/32 финализ удучIвиди. Иштирак шулайи вари футболистарин кьадар 10 агъзурилан зиина удубчIвура.

Гьаму йисан республикайин дережайиъди мектебарин футболин лигайиъ 2-пи классарилан гъадабгъну 9-пи классдизкьан вуйи баяр-шубар иштирак шула. Душваъ 8 параллелиъди 512 команда иштирак хьиди. Финалин гьацIаъ ва финалиъ 32 командайиан 480 касди иштираквал апIиди.
1/8 финал ккебгъхъанмина талитар РД-йин образованиейин ва илимдин министерствойин РДЮСШ-дин майднариин гъягъиди. Финалин талитар майдин вазлиз планламиш дапIна.