Мейлан Нежефов

Октябрин 11-пи йигъан Хив райондин администрацияйин дараматариъ райондин 7-пи дих апIбан депутатарин собраниейин къанна хьубпи сессия кIули гъубшну. Гьял апIбан бадали, сессияйиз 7 месэла адагънийи.

 

Райондин депутатарин собрание-йин председатель Садикь Исрафилов ди кIулиъ гъубху сессияйиъ райондин гъулариан вуйи 33 депутатдикан 26 иштирак гъахьнийи.

Сессияйииз гьял апIуз адагънайи месэлйиркан кьюб Ляхла ва ЦIудухъ гъуларин мектебариз лайикьлу касарин ччвурар тувбаз бахш дапIнайидар вуйи.

Ляхлаарин кьялан мектебдиз табасаран шаир, Дагъустан Республикайин лайикьлу мялим ва тербиячи Маллакерим Агъакеримович Маллаевдин, хъа ЦIудхъарин тамам дару мектебдиз ихь закурин аку йигъ ва жил’ин ислягьвал бадали Украинайин ругариин чан жан фида гъапIу, «ЧВК Вагнер» дестейин гьюжум апIру взводдин командир, Кьягьялвалин ва жара медаларин сагьиб Ильгьам Пирмурадович Гьясановдин ччвурар тувди.

Улупнайи кьюбиб мектебарин директорарра депутатарин корпусдиз дахил шула. Чпин маракьлуди гьязур дапIнайи докладариъ дурари лайикьлу касарин уьмрикан ва яратмиш’валин рякъкан гъапнийи. Аьхириъ, чпин йишвариин гъуху педсоветариъ саб улхуб-рахубра адарди адагънайи къарарариканра мялуматар тувнийи.

Зиихъ къайд дапIнайибдихъди сабси райсобраниейин председатели депутатарин разивалра ахтармиш гъапIнийи. Мялум гъабхьиганси, наразивал улупрур депутатарин арайиъра гъахьундайи.

Гьаму йигъари кьюбиб мектебариъра, дурариз му гьюрматлу инсанарин ччвурар тувбахъди аьлакьалу вуди, аьхю серенжемар гъахбанди ву.