Зубайдат Шябанова
Гум’арин гъулан поселениейин вакилар, гьамусяаьт Моска шагьриъ яшамиш шулайи меценатар Мягьямед Шихсефиевди ва Несредин Мягьмудовди Гум’арин ва Халгъарин гъуларин поселенйириан хусуси метлеб айи дявдин операцияйиъ иштирак шулайи 100-дихьна эскрарин 165 бицIириз ЦIийи йисандин меълишнар айи пешкешар багъиш гъапIну.
Думу пешкешар йишвариина гьарсар бицIирихьна рукьуз Табасаран райондин депутатарин собраниейин председателин заместитель Низами Агъаризаевди, Гуми ва Халагъ гъуларин поселенйирин администрацйирин вакилар Вадим Муртазаевди, Мягьямад Аьлиевди ва Эфенди Ражабовди кюмек гъапIну.
Дурарин гьарсар эскрин хизанариин улубкьури, хизанарин вакилар меценатарин терефнаан ЦIийи йисахъди тебрик апIури, бицIидариз пешкешар тувну.
«Абйир хизанарихьан ва веледарихьан ярхла айи вахтна, иллагьки гьамцдар рягьимлу акцйири ва серенжемари гъайгъушнан ва сабвалин манишнан гьиссар кьувватлу хьуз гъитру», – къайд гъапIнийи Низами Агъаризаевди.
