Гюльнара Мягьямедова

Августдин 27-пи йигъан Хив райондин Хив гъулаъ райондин глава Ярмет Ярметовдин регьберваликкди муниципалитетдин образованиейин гъуллугъчйирин августдин совещание кIули гъубшну.
Душваъ ккудубшу урхбан йисандин натижйир гъивну ва райондин образованиейин гъурулушдин гележегдин артмиш’валин 2025-2026-пи урхбан йисаз айи планарикан ктибтну.

Совещаниейин ляхниъ райондин Глава Ярмет Ярметов, образованиейин отделин начальник Назаряли Тарланов, райондин мектебарин директорар ва мялимар иштирак гъахьну.
Совещаниейиъ удучIвну гъулху Назаряли Тарлановди райондин мектебариъ айи аьгьвалатнакан, ученикари ЕГЭ тувбан натижйирикан, образованиейин дережа за дапIну ккуниваликан гъапнийи. Дугъан гафариинди, мектебариъ предметар кивру мялимар гьуркIрадар. Гьаму урхбан йисаз «Земский мялим» программайиинди райондиз цIийи мялимар гьаънадар. Улихьна думу программайиинди лихурайи кьюр мялимдин 5 йисандин вахт сарун ккудубкIура.
Образованиейин отделин гъуллугъчи Эльмира Ярметовайи «Сарпидарин гьяракат» ерли отделениейин ляхникан, бязи мектебарин хъуркьуваларикан ктибтнийи. Думу райондин Кашкент ва ЧIилихъар гъуларин мектебариъ «Сарпидарин гьяракатну» апIурайи ляхниин дийигънийи. Му гъуларин мектебариъ урхурайидар жюрбежюр конкурсариъ жанлуди иштирак шулайивализ дилигну, гьарсаб мектебдиз 200 агъзур манат тувну. Октябрин вазли пул мектебдин счетдиз хътапIиди.
Совещаниейиъ гизаф йисари баркаллу зегьмет гъизигу мялимарин ляхин лишанлу гъапIнийи. М.Митаровдин ччвурнахъ хъайи Сюгют гъулан мектебдин мялим Артик Аьшурбеговдиз, Хив райондин методкабинетдин методист Марат Меджидовдиз, ЦIийи Фригъ гъулан мектебдин мялим Надият Мирзамягьяммадовайиз, ЧIилихъар гъулан мектебдин мялим Динара Гьяжимурадовайиз, ЗахитI гъулан «Ягодка» кIуру бицIидарин багъдин тербиячи Юлия Герейхановайиз, ЦIинитI гъулан мектебдин физкультурайин мялим Халиф Ибрагьимовдиз «Дагъустан Республикайин образованиейин отличник» ччвурар тувну.