Наргиз Гюлечова
ЦIиб улихьнаси Урусатдиъ гъадагъа дапIнайи интернетдин саб социальный сетдиъ, чав гъурху китаб фтикан вуш табасаран чIалниинди мялумат туври, Мугьяммад кIуру сар жигьилин видеойиин алахъунзу. Дугъу интернетдиъ апIурайи ляхнихъди таниш хьуз хъюгъиган, бабан чIал артмиш апIуз мугъу зегьмет зигурайиб аьгъю шуйи. Дишлади дугъаз редакцияйиз дих апIбанди гъахьунза. Чухсагъул чаз – Мугьяммаддиз, теклиф кьабул дапIну, учухьна гъафнийи. Редакцияйиз теклиф апIбан кьяляхъ, Мугьяммад хусуси метлеб айи дявдин опреацияйин иштиракчи вуйибра мялум гъабхьунчуз.
Мугьяммад Аьлисултанов Табасаран райондин ЧIвурдаф гъулан агьали ву. Думу Волгоградский областдиъ бабкан гъахьну. ЦIиб арайилан дугъан абйир-бабар Дагъустандиз кьяляхъ гъафнийи. Учв 6 йисандин яшар хьайизкьан бабахъди яшамиш хьуб’инди гъи ихь сюгьбатчийи лап марцциди багъри чIал апIура.
«Йиз адаш ЧIвурдфан, хъа дада – Жвул’ан вуйиз. Волгоградский областдиъ адашдин ляхнар ккудукIбалан кьяляхъ учу гъулаз гъафнийича. Гъулаъ думукьан кьаназра имдайча. Мектебдиз гъягъру вахт улубкьайиз Мягьячгъалайиз кюч гъахьнийча. Узу меркездиъ 36-пи нумрайин мектеб ккудубкIунза. Мектеб ккудубкIу йисан, математика дубгъуз цIиб гъагъиди вуйивализ лигну, урхуз кучIвуз гъабхьундайзухьан. Гизаф дердра гъабхьнийиз, хъа дусну узу узуз гъапиза: «Имбударихьан шлуган, увхьан гьаз шулдарвухьанхъа?». Гьаму суал фикриъ гъибтну, йиз сад йис гъядядябхъри кIури, колледждик урхуз кучIвнийза. Гъюру йис улубкьайиз, заан образование гъадабгъну ккунивал гьисс дапIну, гьязур хьуз хъюгънийза. Гьаму йисандин арайиъ дарсарра лап ужуди урхуз хъюгънийза, математикара аьгъю гъабхьнийиз. Колледждиъ сад йисан дурхну, хъа йисан ДГУ-йин физический факультетдик кучIвунза. Гьаддихъди сабси колледждиъ урхубра давам апIури имийза. Му ккудубкIбан кьяляхъ, узу гизаф китабар урхуз ккунир вуйиган, филологияйин факультетдин магистратурайиз документар тувну, гьадушваъ урхуз хъюгънийза. Пуз ккундузузки, дина урхуз гъягъруган, узу 1 агъзуртIан артухъ китабар дурхнайза», – ктибтура жигьили.
Сюгьбат давам апIури Мягьяммадди мялум гъапIганси, дугъан дадара китабар урхбиин лап юкIв али кас ву. Гъийин йигъаз дугъу 7 агъзуртIан артухъ китабар дурхна.
«Жвуллиъ айи ич аба Экпер Пирмягьямадов мектебдиъ мялимди лихури гъахьну. Думура китабар урхбиин лап юкIв алир вуйи. Белки гьадгъухъантина йиз дадара, узура урхувалихъ юкIв хъайидар гъахьуншул» – аьлхъюри кIура Мугьяммадди.
Мугьяммад Аьлисултановдиз университетдин кяляхъ, эвленмиш духьну 7 вазлилан армияйиз повестка гъафнийи. ИкибаштIан, жвув’ин али гъуллугъ тамам дапIну ккунду, гьаддиз думу разивалиинди, хулаъ жигьил уьмрин юлдаш гъитну, армияйиз гъягъюру.
«Армияйиз душну 3 вазлилан Воронежский областдиз, хъа гьаддихъан улупурайиб ужуди дубгъурайи 3 бай – Белгородский областдин 245 полкназ гьаънийчу. Думу полкнаъ айидарихъди учура сатIиди хусуси метлеб айи дявдин операцияйин женгариъ иштирак хьуз хъюгънийча. Ич улихь дивнайи вазифа – минйир ккадагъуб вуйи, янаки сапервалин ляхнар тамам апIуб. Сапервалин агъювалар учуз командири улупнийи. Учу асас вуди, йишвну, инсанар даахнайи вахтна, сяаьт 3-4 гъудужвури, минйир ккадагъуз гъягъюри шуйча.
2023-пи йисан сентябрихъан 2024-пи йисан майдизкьан улихь дивнайи гьаму вазифйир тамам апIури имиза. ИкибаштIан, сапер сабантIан гъалатI шулайиб дар, гьаддиз му ляхин гизаф ихтиятди, фикир апIури тамам дапIну ккундийи. Ич командирира учуз, фикир хъайи саперин уьмур ярхиб шулу, кIури шуйи.
Гьяйифки, гьаци ужуди аьгъю, учуз думу аьгъювалар улупу командир чав минайиин алахъну. Душваъ ади гъахьи вахтнан арайиъ учуз варитIан гъагъиди алахьу йигъар, мартдин вазли ихь уьлкейиъ сечкйир гъягъюрайи йигъар вуйи. Душмнарин ухьуз аьхю зарар тувуз кьаст вуйи. Гьадму йигъари зат даахну нивкIра адайчуз.
Козинки кIуру гъулахъ йиз командирра, хъанара жара эскрарра айи машин минайиин алабхъну, гъутIубкIнийи. Саспи баяр йисирвализра гъидиснийи. Магьа цIиб улихьнаси дурар деетну кIури, хабар хъубкьунзухьна. Гизаф шад гъахьунза», – гъапнийи Мугьяммадди.
Хусуси метлеб айи дявдин операцияйиъ учв иштирак гъахьи 7 вазлин арайиъ Мугьямад Аьлисулановдиз читинваларра фукьан вушра алахьну. «Саб ражари зат шид адарди вазтIан артухъ вахтнан арайиъ жикIуз дархьидира гъузунча», – кIваин апIура эскри.
Алахьу читинваларра, гъагъишнарра вари аьгь дапIну, Ватандин улихь чан буржира тамам дапIну, Мугьяммад хулаз кьяляхъ гъафну. Гьаддихъан дугъу чаз айи аьгъювалар аргъаж шулайи наслариз улупури, Мягьячгъалайиъ айи Урусатдин Игит Мугьяммад Нурбагьандовдин ччвурнахъ хъайи 37-пи гимназияйиъ лихуз хъюгъну. Гъи думу СВО-йин иштиракчйирикан, ужудар хъуркьувалар улупури, сарпирди лихурайи мялим ву.
