Наргиз Гюлечова
Москвайиъ айи Румянцевдин ччвурнахъ хъайи Гьюкуматдин циркнанна эстрадайин искусствойин училищейиъ Варихалкьарин арайиъ вуйи цирковой гимнастикайин «Аура» ччвур тувнайи II фестиваль кIули гъубшну.

Фестивалин жюрбежюр номинацйириъ Дагъустандин Огни шагьриан К. Къурбановдин ччвурнахъ хъайи Республикайин бицIидарин циркнан мектебдиъ аьгъювалар гъадагъурайи шубари, иштирак духьну, ужудар натижйир улупну.
«Ккебгърайидар (4-7 йис)» номинацияйиан Жасмина ва Ясмина Къурбановариз чпин бажаранвалиинди жюри гьяйран гъапIну ва, чпин гьунарариз лигну, 1-пи йишв гъадабгъну. Дурар гьязур гъапIу мялим Низакет Рамазанова ву.

«Пишекрар (8-11 йис)» номинацияйиан Ханифа Нурягьмедова «Фикрар уьрхюрайир» нумра хьади 2-пи йишван сагьиб гъахьну.
Хъа «Пишекрар (12-14 йис)» номинацияйиан «КIван гьенгер» комбинация хьади удучIву Наида Шерифовайиз ва Ханифа Нурягьмедовайиз жюрийи кьюбпи йишв тувну. Гьамуну кьюбиб номинацйириз ученикар гьязур гъапIу мялим Гюльмира ТIайибова ву.
Гьамцдар натижйириинди Дагъу-стандин циркнан мектебдиъ бицIидар гьязур апIбан дережа заануб вуйиб нубатнан ражари тасдикь шула.