Мейлан Нежефов
ЦIиб улихьна, Урусатди Украинайиъ гъабхурайи хусуси метлеб айи дявдин операцияйиъ улупурайи гьунарариз лигну, ихь ватанагьли Эльдар Бачанов II дережайин «Дирбаш’вализ лигну» кIуру медалин сагьиб гъахьну.
Эльдар Бачанов 1998-пи йисан 21-пи июлиъ Хив райондиъ Асккан Яракк гъулаъ Айхалум ва Мягьямедрасул Бачановарин аьхю хизандиъ бабкан гъахьну. Чпин юкьур велед айи хизандиъ Эльдар кьюрпир ву. 2004-пи йисан багъри гъулан мектебдиъ урхуз кучIвну. 2015-пи йисан мектеб ккудубкIу Эльдар чан адашдихъди тикилиш’валин ляхнар апIури гъахьну. 2019-пи йисан сад йисандин эскервалин буржи Кьибла Сахалиндиъ тамам апIуру. Эльдари чан буржи намуслуди кIулиз адабгъуб думу тербияламиш гъапIу ва аьгъювалар туву мектебдиз ва адашдизна дадайиз гъафи гьюрматнан кагъзарира субут апIура. Жараси хьузра мумкин дайи, фицики дугъу ва имбу веледари, чпин дадайин, халис табасаран халачачи, бицIидарин багъдин гъарашугъ Айханумдин тербия дибисну, чпи апIурайи ляхин баркаллувалиинди кIули гъабхура.
2021-пи йисан Эльдари Урусатдин яракьлу кьувватарихъди контракт гъийибтIнийи. Гьяйифки, уьмриъ арайиз гъафи жюрбежюр гьядисйириан контракт ккудубкIайизкьан гъуллугънаъ гъузуз мумкинвал гъабхьундайи. Хъа 2022-пи йисан 26-пи сентябриъ ихь уьлкейиъ кIули гъубшу бегьем дару мобилизацияйин дахилнаъди Эльдар кьисматну Украинайиз гьаънийи. Гьадушваъ жигьил «Урал» машиндин шоферди лихура.
Гъи абайин хулаъ Эльдариз, думу гъалибвал хьади гъювализ, адашна дадаси, кьюр чина сар чве ккилигура. Дилин гъафибси, сумчир апIуз планламиш дапIна. Эльдарин уьмрин юлдшихъди вуйи шиклиз ва сумчрин кумран ниъ хъайи ашар-шурпйириз вари ккилигурхьа.
