Гюльнара Мягьямедова
Дагъустандин АПК-йин асас циркларикан саб – мягьсулар гьясил апIру циркил ву. Диди малдарвал артмиш апIузра гизаф мумкинвалар тувру. Республикайиъ хьадукран мягьсуларси, чвлин культурйирра битмиш апIура.

2023-пи йисан республикайин вари жюрейин мяишатариъ 224 агъзур гектариъ гъулан мяишатдин культурйир дурзна. Думу улупуб гъубшу 2022-пи йисандин улупбарихь тевиган, 2 агъзур гектариинди артухъ ву. Хъа дурзнайи чвлин мягьсуларин кьадар, укI дубзнайи чюллерра гьисаб гъапIиш, 373,4 агъзур гектариина удубчIвуру.
Республикайиъ дурзнайи жилар артухъ хьувалин себебарикан саб – мейвйир ва картфар гьясил апIувал артмиш апIбан федеральный проект уьмриз кечирмиш апIуз гьюкуматдин терефнаан кюмек туврайивал ву.
Дагъустандиъ дюгю убзувалин циркилра хъайи-хъайиси артмиш шула. Гьаму йисан 31,7 агъзур гектариъ дюгю дубзна. Табиаьтдин ужудар гьавйири мумкинвал тувиш, цирклиъ лихурайи зегьметкешари 140 агъзур тонна «лизи» дяхин уч апIувал планламиш дапIна.
РД-йин гъулан мяишатдин министерствойин мялуматарин гъуллугъну туврайи хабрариинди, 18-пи августдиз чвлин мягьсулар уч апIувал аьхирихъна гъафну.
«Гьаму йигъаз 89,4 агъзур гектар чюллериан (96%) мягьсул уч дапIна. Уч дапIнайибдикан, гадар дапIну, 207 тоннайинакьан дяхин ккадабцIна. Республикайиъ, кьялан гьисабниинди, саб гектар хутIлиан 23,1 центнер тахил уч апIура», – дупна министерствойин мялуматнаъ.
Къайд апIуб лазим вуки, республикайиъ уч апIурайи вари чвлин мягьсулин 64% Хасавюрт, Къарабудагъкент, Нугъай, Къизлар, Сергогъала, Буйнакск районариъ битмиш апIура. Гьаму йисан Буйнакск, Сергогъала,Тарумовский, Къарабудагъкент, Нугъай, Къизлар, Казбековский районариъ мягьсулин бегьерлувал улихьна йисаритIан артухъ ву.