Гюльнара Мягьямедова
22-пи августдиъ Дагъустандин Глава Сергей Меликов улихьнаси Кумтургъала райондиъ автосервисдиъ тIубкIувалин натижайиъ зарар гъабхьидариз кюмек тувбан месэлйир гьял апIбан бадали, республикайин рягьимлувалин фондарин кIулиъ айидарихъди гюрюшмиш гъахьнийи. Гюрюшдиъ гьюкмин органарин ва гьюкуматдин «Вари сатIиди» фонднан вакиларра, рягьимлувалин «Туба» мобильный приложение яратмиш гъапIдарра иштирак гъахьнийи.
Сергей Меликовди тIубкIувалин натижайиъ зарар гъабхьи хизанариз кюмек вуди «Инсан» ва «Умуд» («Надежда») рягьимлувалин фондари 60 миллион манатдилан зиина пул уч апIуваликан гъапнийи. Дугъан гафариинди, фондарин кIулиъ айидари, саринра теклиф дарди, чпин жягьтлувалиинди думу ляхин кIули гъубхну. Рягьимлувалин кюмекналан савайи, гъийихдарин хизанариз саб миллион манат пул, хъа зийнар гъахьидариз компенсация тувуз къарар адабгъна.
Республикайин кIулиъ айири къайд гъапIганси, зарар гъабхьи гьарсар касдихьна кюмек рубкьбан бадали, тешкилатари сатIиди ляхин гъабхуб лап важиблу ву, МЧС-ра, сагъламвалин министерствора му ляхниина жалб апIиди. Республикайин бюджетдиан ватандашарин дадаргънайи хулар рас апIбаз пулин дакьатар жара дапIна. Хулар цIийи алаъру тешкилатаризра чпин гъапIу ляхнин гьякьи тувди.
Рягьимлувалин фондари Таба-саран райондиъра жюрбежюр акцийир гъахура. Гьаму гьяфтайиъ душваъ нубатнан ражари «Умуд» ерли рягьимлувалин фондну «БицIир мектебдиз гьязур апIин» акция тешкил гъапIну – райондин гъулариан касибвал кайи 30 хизандиан бицIидариз мектебдиз лазим вуйи алатар айи портфелар бахиш гъапIну.
Акция тешкил апIбак шейх Исамудин Эфендийи, Табасаран райондин Жямяаьтлугъ палатайин председателин заместитель Айваз Рамазановди, райондин собраниейин депутат Анзор Къазимягьямедовди лайикьлу пай кивну. Акцияйин тешкилатчйири меценатариз сабабнан ляхниъ иштирак хьувализ чухсагъул мялум гъапIну.
КIваина хурача, цIийи урхбан йис ккебгърайи вахтнаъ гьаму жюре акцйир РД-йин зегьметнан ва яшайишдин артмиш’валин министерствойин регьберваликкди жямяаьтлугъ ва рягьимлувалин тешкилатари, кюмек тувуз ккуни инсанари тешкил апIура.
