Гюльнара Мягьямедова

 Ноябрин 9-пи йигъан шагьрин округдин Ипподром ва Загородный бицIи районариъ, Талги поселокдиъ ва гьацира Семендер поселокдин ва Красноармейское гъулан аьтрафариин ерлемиш духьнайи 4 мектебдиъ Урусатди гъабхурайи хусуси метлеб айи дявдин операцияйиъ игитарси гъийиху эскрариз бахш вуди, «Гьюрматнан багъ» акция кIули гъубшну.

Семендерин ва Красноармейское гъулан арайиъ айи цIийи 54-пи мектебдиъ «Гьюрматнан багъ» гьадму мектебдин директор, Урусатдин Игит Нурмягьямед Гьяжимягьямедовдин дада Сапижат Мазаевайин тешкиллувалиинди ибтуб вуйи. Багъ ачмиш апIуз ва гъелемар кивуз Дагъустандин саки вари районариан Украинайиъ гъабхурайи хусуси метлеб айи дявдин операцияйиъ баяр гъийиху, «Дадйирин кьувват» тешкилатдин иштиракчйир уч гъахьнийи.

КIваина хурача, сабпи ражари «Гьюрматнан багъ» ччвур али варихалкьдин акция 2020-пи йисан гъубхнийи. Дидин метлеб — Ватандин Аьхю дявдиъ гъийиху гьарсар эскрин гьюрмат аьсрариъ уьбхюб вуйи. Му акция «Экология» милли проектдин дахилнаъди,
Урусатдин мярифатнан министерствойин, Урусатдин табиаьтдин ва экологияйин министерствойин, ярквран мяишатдин Федеральный агентствойин кюмекниинди «Гьюрматнан багъ» АНО-йи, Вариурусатдин «Гъалибвалин волонтерар» жямяаьтлугъ гьяракатну
ва Гъалибвалин полководцйирин гьюрмат уьбхюрайи Фондну тешкил гъапIуб ву.

«Гьюрматнан багъ» акция республикайин вари аьтрафариин гъабхура. Думу ихь гъийиху игитарин багахьлуйир сатIи апIру гизаф важиблу серенжем ву.

Региондин Главайин Указдиинди Гьюрматнан багъар Дагъустандин вари 52 муниципалитетдиъ кивди. Республикайин 14 райондиъ гьюрматнан багъар 3-пи ноябри ачмиш гъапIнийи, гьадму гьисабнаан Табасаран, Хив ва Дербент районариъра.
(Акцияйикан хъайи-хъайиси газатдин шубубпи машнаъ урхуз шулу).