Наргиз Гюлечова

«Табасарандин нурар» газатдин 31-пи нумрайиъ «Дада-дилаварчи» кIуру грантдин конкурсдиъ гъалиб гъахьи ихь ватанагьли Зарият Гьяжиибрагьимовайин «Дадайин ирс» проектдиз 150 агъзур манат тувну» кIуру макьала чап дапIнайча.
Къайд дапIну ккундуки, думу конкурс «Йиз Бизнес» центри Дагъустандин главайин грантариз тешкил гъапIуб вуйи.
Конкурсдиъ гъалиб гъахьи Зарият Гьяжиибрагимовайин проект юрутмиш апIури, гьаму йигъари Мягьячгъалайиъ ерлешмиш дубхьнайи Дагъустандин халкьарин сяняаьткарваларин шей’ар айи ва дицдар шей’ар апIуз улупру «Чегери» устадханайиъ «Дадайин ирс» проектдиъ иштирак хьуз ккуни касар гъядягъбан серенжем кIули гъубшну. Душваъ республикайин меркездин 1-пи ва 14-пи нумрйирин мектебариан вуйи, халачайин искусство дубгъуз ккуни шубар иштирак гъахьнийи.

Дупну ккундуки, му прокектдин асас метлеб аргъаж шулайи наслар халачи убхувалихъди таниш апIуб ву.
Проектдиъ иштирак духьну, халачачивалин ляхин дубгъуз ккунидарин арайиан ужударсдар гъядягъбан бадали, дурариз мурсликан цIикIвар апIуз ва аьдати табасаран халачийин накьишдик китIрайи гугар, рангар хъабалгруси китIбан табшуругъ тувнийи. Туву табшуругъдихьна дикъат айидариз, марцциди ляхин апIрудариз, дусну гъузуз шлудариз ва апIурайи ляхнихьна яратмиш саягънинди лигувал айидариз кьимат тувнийи. Натижайиъ иштирак гъахьидарин арайиан 15 шуркан ибарат вуйи десте тешкил гъапIну.
Проектдин авторин гафариинди, конкурсдин натижйириинди гъядягъу ужударсдар 15 шураз дугъу дериндиан чан ккебгъну ккудубкIайизкьан халачачивал улупиди.