Гюльнара Мягьямедова
2024-пи йисан 25-пи январиъ Табасаран райондиъ депутатарин Собраниейин нубатнан дару сумчIурна хьубпи заседание кIули гъубшнийи. Думу муниципалитетдин глава ктагъбан месэлайиз бахш дапIнайиб вуйи.
Конкурсдиъ иштирак хьуз 11 касди чпин документар тувнийи.
Глава ктагъбан конкурсдин сабпи пайнаъ кандидатарин документар РД-йин Главайин ва Правительствойин администрацияйин комиссияйи ахтармиш гъапIнийи. Конкурсдин сабпи пайнан кьяляхъ Табасаран райондин главайин гъуллугъниина 4 кандидат гъузнийи: Мягьямед Къурбанов («Табасаран район» МО-йин администрацияйин глава), ТIагьир Рягьимов (Табасаран райондиъ ОПФР-дин идарайин кIулиъ айир), Аьгьмед Кьулиев (бикар), Зейфулла Рашидов (Табасаран райондин финансарин управлениейин кIулиъ айирин заместитель).
25-пи январиъ лисхъан сяаьт 3-диъ конкурсдин 2-пи пай кIули гъубшну. Вари юкьур кандидатдихъди РД-йин Главайин ва Правительствойин администрацияйиан дуфнайи вакилари сюгьбат (собеседование) гъубхну. Дидланра савайи, дурари тестарин кюмекниинди уьлкейин ва муниципальный къанунчивалиан кандидатариз айи аьгъювалар ахтармиш гъапIнийи.
Сюгьбатнан кьяляхъ конкурсдин 3-пи пай райондин депутатарин собраниейиъ сесер тувбиинди кIули гъубшнийи. Вари депутатари чпин сесер улихьнара Табасаран райондин главади лихурайи Мягьямед Къурбановдихъан тувнийи.
Мягьямед Къурбановдин чаин ихтибарвал гъапIу гьарсар касдиз ва райондин вари агьалйириз чухсагъул мялум гъапIнийи. «Йиз, жямяьтлугъдинна экономика жигьатнаан район артмиш апIбан программа узу, гъулариъ гъахьи гюрюшариъ агьалйирин терефнаан хаишарин ва теклифарин бинайиин алди, дюзмиш апIбанди вуза. Чухсагъул кIураза ватанагьлийириз чпин ватандаш’валин фикриз ва узуз даягъ хьувализ», – гъапнийи чан улхбаъ райондин цIийиди ктагъу главайи.
«Табасарандин нурар» газатдин редакцияйин коллективди Мягьямед Къурбанов сабсан ражари Табасаран райондин главади ктагъбахъди кIваантIан тебрик апIури, дугъаз чан ляхниъ заан хъуркьувалар, райондин политика, экономика, культура, агьалйирин дуланажагъ артмиш апIуз мюгькам сагъвал ккун апIура.
