Зубайдат Шябанова
Январин 23-пи йигъан Москва шагьриъ ВДНХ-йиъ вари Урусатдин «Багъридар – ккунидар» кIуру хизандин форумдиъ уьлкейин Президент Владимир Путин иштирак гъахьну ва «2024-пи йис – Хизандин йис» лишниккди гъябгъюрайиваликан мялумат тувну.
«Урусат, дугъриданна, аьхю хизан, хизанарин хизан гьисаб шула. Хизандиъ ихь культура, сабвал, милли хасият мюгькам шула. Хизанди аьдатар уьрхюри, аьгъювалар туври, ихь насил тербияламиш апIура. Хизандин асас вазифа – веледар арайиз хуб, насил давам ва тербияламиш апIуб ву. Гьаци ухьу хайлин аьсрарин тарихдиъ ихь халкь гужал ва кьувватлу апIурахьа», – гъапну Президентди.
КIваин апIуз ккундучуз, 2023-пи йисан ноябрин вазли гьюкуматдин главайи Урусатдиъ 2024-пи йис Хизандин йис вуди тяйин апIурайи къарарикк къул гъизигнийи. Думу къарар гьюкуматдин сиясатди хизандин ихтиярариз ва хизандин багьалу аьдатариз артухъ фикир тувуб метлеб ади кьабул гъапIуб вуйи.
Москвайиъ гъябгъюрайи «Багъридар – ккунидар» форумдиз вари Урусатдин «2023-пи йисандин хизан» конкурсдиъ гъалиб гъахьи СВО-йин иштиракчи Аьлибег Къазанбиевдин аьхю хизандиз теклиф гъапIнийи. Республикайин глава Сергей Меликовди думу форумдин мяналуваликан кIури, къайд гъапIганси, «Урусат» выставкайиъ иштирак шулайидариз хайлиндариз Дагъустан зат гъябкъюб даршра, ихь республика ккун хьибди. Гьаци Главайи Краснодар крайин 11 велед айи Солодовниковарин аьхю хизандиз Дагъустандиз гъюбан теклиф гъапIну. Думу хизан ВДНХ-йиъ ихь республикайин стенддиин гьяйран гъахьнийи, амма Дагъустандиз гъягъбакан вуйи чпин умуд фици юрутмиш апIуруш, фикрарикк ккахънийи.
«Гирами Елена, Владимир ва ичв 11 велед. Учу хялариз гьарган шадди ккилигурача ва Хизандин йисан ичв кIван марцци хиялариз фикир тутрувди гъибтуз гъабхьундарчухьан. Солодовниковари, дагъустандин хайлин газаф бицIидар айи аьхю хизанариси – хизандин багьалу кюгьне аьдатар уьрхюра, ва дурар жара хизанариз чешне шула. Дурариз читинваларихьан гучIудар, аьксина, сар-сариз кюмекназ гъювалилан, сабвалилан, сар-сарихьна айи гьюрматналан ва ккунивалилан дурарин хизандин шибритI ккебгъра. Вари дагъустанлуйирин терефнаан учвуз теклиф апIури кIураза, учвуз мумкинвал ва вахт ккабхъубси, ич республика ичв хизан хялижвди кьабул апIуз гьязур ву. Ич успагьи регион учвуз шиклариктIан артухъ кьабул шлувалиин умудлу вуза», – гъапнийи Сергей Меликовди.
Хизандин йисан Дагъустандиъ гъахру серенжемарин план тартиб дапIна. Душваъ 120-тIан артухъ мажлисар улупна. Дурарикан вуди культурайин, спортдин, рягьимлувалин ва хайлин жара серенжемар хьиди.
