Мейлан Нежефов
Наан яшамиш шулашра, инсандин вартIан аьхю метлеб – чан юкIв зигру ляхнихъ хъади, гъарашугъарин арайиъ гьюрмат ади, халис зегьмет зигури хьуб ву. Хъа албагу хизандин эйси хьувал гьарсар инсандин кьисматнаъ вартIан аьхю бахтси гьисаб апIуз шулу.
Ихь халкьдиз «Албагу кюлфетди жилра гъизилиз илтIибкIур» кIуру мисал а. Ухьуз тувнайи уьмриъ лайикьлуди яшамиш хьпан бадали, неззетниинди уьмур гьапIну ккундар. Жвуваз гьюрмат дапIну ккундуш, багахь хьайи инсанарихьинди жвувра гьюрматлувалиинди илтIикIури ккунду.
Гъийин йиз макьалайин игит, Хив райондин Асккан Яракк гъулан вакил Рустамхан Сефиханов 1947-пи 5-пи декабри, Агъларинна Кемсран аьхю хизандиъ бабкан гъахьну. Адашди марччлихъанвал, хъа дадайи халачачивал апIури, дурари чпин мадар апIури гъахьну. Ухьуз аьгъюганси, думу йисари яшамиш хьпан бадали, гьарсар бицIири, назук яшнахъан хъюгъну, абйир-бабариз кюмек апIури, нежбервалин жюрбежюр ляхнар апIури, зегьмет зигуз дубгъури гъахьну. Гьаддиз, фуну ляхнихьнаси, урхбахьнара маракьлувал айи дагълу жигьил Рустамханди, чан кьисмат ужуб хьпан бадали, вахт давди гьапIундар.
1954-1963-пи йисари багъри гъулан 8 йисандин мектебдиъ дурхну, Рустамхан Дербент шагьрин педучилищейик урхуз кучIвру ва ужудар аьгъювалариинди 1967-пи йисан му урхбан тешкилат ккудубкIуру.
Табасаран райондин ТинитI гъул’ан вуйи Гюлзаман кIуру шурахъди хизан ккебгъру. Аьгъюваларихьна аьхю маракьлувал айи жигьили заан образование гъадабгъбакан фикрар апIури гъахьну, ва 1972-пи йисан думу Дагъустандин гьюкуматдин институтдик кучIвру. Ужудар аьгъювалар гъадагъну, институтра ккудубкIуру.
Рустамхан Агъларович Яргъил, ЧIере, Мажвгул, Асккан Яракк гъуларин мектебариъ урус чIалнанна литературайин дарсар киври, артмиш шулайи баяр-шубариз тербия туври, 54 йисандин арайиъ, чан гъарашугъарин, гъуларин жямяаьтарин, баяр-шубарин арайиъ ужуб гьюрмат ади, лайикьлуди гъилихну.
Ляхниъ улупу хъуркьувалариз лигну, дугъаз «Дагъустандин лайикьлу мялим» ччвур тувну. Рустамхан Сефиханов гьацира республикайин образованиейин министерствойин, халкьдин образованиейин работникарин профсоюздин жюрбежюр медалариинди, гьюрматнан грамотйириинди лишанлу гъапIну. Зегьметнан ветеран, лайикьлу мялим 2022-пи йисазкьан чан багъри гъулан мектебдиъ гъилихну.
Чан уьмрин юлдаш Гюлзамандихъди, Рустамхан Сефихановди 6 веледра (хьур байна сар риш) тербияламиш гъапIну.
Хьур балкан юкьури – Эльмурзайи, Умаханди, Фаридди ва Рафисди Ватан уьбхбан гъуллугъ ктабгъну, ва гьамусяаьт дурари, ихь гъунши гьюкуматдин жилариин ва сяргьятарихъ гъабхурайи хусуси метлеб айи дявдин операцияйиъ иштирак шули, намуслувалиинди чпин вазифйир тамам апIура. Мурарикан гьарсарикан жа-жаради гъибикIишра, артухъ даршул кIури хиял вуйиз. Дявдин духтир Фарид Сефихановдикан артухъдиси дарпиди гъитузра шулдар. БицIивахтнахъанмина духтир хьпакан фикрар апIурайи бали Астрахань шагьрин медакадемияйиъ урхуз хъюгъну, хъасин Саратовдин дявдинна духтирвалин институтдиъ чан урхуб давам гъапIну. Багъри Ватандиин читин вахт улубкьган, гъирагъдиъ гъузуз дархьи ватанпервер Фарид Сефиханов чан хушниинди хусуси метлеб айи дявдин операцияйиъ иштирак шула. Дугъу, дявдин гьяракатарин садпи йигъарилан хъюгъну, зийнар гъахьи эскрар аьжаликкан ккадагъура. ШартIар адру, хатIалу йишвариъ эскрар бадали женгнаъ айи духтрарра, эскрарси, гьар дакьикьайиъ хатIайикк кка.
Дупну ккундуки, Рустамхан Сефихановдин худул – гьамусяаьт Луганск шагьрин жилиин ислягьвал гъалиб хьпан бадали женг гъабхурайидарин жергейиъ а.
Рустамхан Агъларовичдизна Гюлзаман Багьаутдиновнайиз 18 худулна 13 гудул а.
Му игит баяриз, худлариз ватанпервервалин тербия туву бажаранлу мялим, ужур кюлфетчи, 77 йистIан дубхьнадру Рустамхан Агъларович гъубшу йисан 24-пи декабри вахтсузди уьмриан гъушну.
Ихь Ватандин гележег бадали женгнаъ айи Сефихановариз, ислягь йигъар дуфну, сагъ-саламатди кьяляхъ хъадакну гъюз кьисмат ибшри!
