Зубайдат Шябанова
Августдин 25-пи йигъан Мягьячгъала шагьрин Урус драмтеатриъ образованиейин гъуллугъчйирин августдин яркьу совещание кIули гъубшну. Дидин ляхниъ республикайин глава Сергей Меликовра иштирак гъахьну. Чан удучIвну улхуб дугъу аргъаж шулайи наслиз тербия ва аьгъювалар туврайи дагъустан мялимариз чухсагъул мялум апIбалан ккебгъну ва образованиейин цирклин артмиш’валин улихь дийигънайи месэлйирикан ва дурар гьял апIру рякъярикан гъапну.
Дагъустандин Главайи мялум гъапIганси, образованиейин цирклиъ асас месэлйирикан саб – дагълу гъулариъ ва бицIи шагьрариъ мялимарин пишейин ад за апIувал ву. Мидланра гъайри, думу мялимарин пишекарвалин дережа за апIуваликан, ЕГЭ ва ОГЭ гъахру вахтна кьиматар дугъриди, байтерефди, майилвал дарди дивну ккуниваликан, образованиейин идарйирин инфраструктура къайдайиз хуваликан ва жара месэлйирикан гъулхну.
Сергей Меликовди, бицIи комплектдин мектебарихьан гьудучIвну аьхю, бицIидариз деврин вари шараитар айи интернатар арццуз рякъяр дагну ккуниваликанра гъапнийи. Главайин гафариинди, республикайиъ дицистар интернатар арццнайи районар а. Дюзди гъапиш, саб жюрейинра шараитар вая 10-кьан урхурайидар адру бицIи гъулариъ цIийи мектебар тикмиш апIайиз, аьхю гъулариан дурар мектебдиз гъахру автобусар деетуб гьииди ву.
Серенжемдиъ Урусатдин Феде-рацияйин мярифатнан министр Сергей Кравцовдин вари уьлкейин мялимарихьна видеойиинди илтIикIувал улупнийи. Дугъу уьлкейиъ Педагогдин йис мялум апIбан метлебарикан – чпин вари вахт ва кьувват бицIидарихъди ва жигьиларихъди вуйи зегьметназ сарф апIурайи гъуллугъчйирин ляхниз фикир тувуваликан, гъийин девриъ мялимарин пишейиз игьтияж айиваликан – гъапнийи ва мялимвалин пишейихьна вуйи жигьиларин лигбар ужуб терефнахъинди дигиш дубхьнайивал къайд гъапIнийи.
Дагъустандин образованиейинна илимдин министр Ягь’я Бучаевди чан докладдиъ ккебгърайи цIийи йисан мектебариъ шлу цIийиваларикан мялумат тувнийи. Дугъу къайд гъапIганси, 5-11-пи классариъ урхурайи баяр-шубари гьяфтайиъ хьуд йигъантIан урхидар.
«Урхурайидарин кьадар аьхюб вуйи мектебариз федеральный гьюкуматдин образованиейин цIийи стандартарин (ФГОС) тIалабариинди урхбан пландин сяътар тартиб апIбаъ, дарсарин кьяляхъ аьлава ляхин тешкил апIбаъ читинвалар арайиз гъюрувалин учу гъавриъ ача. Гьаддиз муниципалитетарин главйирикан, образованиейин управлениейин, уьмуми образованиейин идарйирин кIулиъ айидарикан, мектебариъ 5-11-пи классариъ урхурайидар, санитарияйин къанунар ва къайдйир уьрхюри, урхбан хьуд йигъандин гьяфтайиина улдучIвувал тешкил апIуб ккун апIураза. Ичв адресназ тялукь кагъзар хъадаънача», – гъапну Бучаевди.
Совещаниейин аьхириъ ляхниъ заан натижйир улупу мялимар гьюкуматдин ва образованиейин цирклин наградйириинди лишанлу гъапIнийи.
