Умгьанат Сулейманова

5-пи октябри, Мялимдин йигъан, Табасаран райондин администрацияйин улихь мялимдиз бахш вуйи ядигар ачмиш апIбахъди аьлакьалу шадвалин серенжем кIули гъубшну. Дупну ккундуки, му ихь республикайиъ ерли мялимариз абццрайи сабпи ядигар ву. 2006-пи йисан Мягьячгъалайиъ ачмиш гъапIу ядигар урус мялим дишагьлийириз бахш дапIнайиб вуйи. 

Шадлугънан серенжемдиъ Табасаран райондин глава Мягьямед Къурбанов, РД-йин образованиейиина илимдин министрин вазифйир тамам апIурайи Ягь’я Бучаев ва дугъан заместитель Аида Далгатова, РДйин парламентдин депутат Мягьяч Зугьрабов, Дагъустан Республикайин образованиейин ва илимдин работникарин профсоюздин председатель Мягьямад Амиродинов, ядигарин автор, скульптор Мирзабег Аьлимирзаев, райондин мектебарин директорар ва мялимар, бицIидарин багъарин заведующйир, мектебариъ урхурайи баяр-шубар иштирак гъахьнийи. 

Мярака, Табасаран райондин глава Мягьямед Къурбановди ачмиш гъапIнийи.

– Гьюрматлу мялимар, тербиячйир, аргъаж шулайи наслиз аьгъювалар ва тербия тувбан читин ва гьюрматлу ляхниин машгъул вуйи вари пишекрар! Учву вари пишекарвалин машкврахъди тебрик апIураза. Гъит ичв ляхни ихь вари жямяаьтлугъ, урхурайидар, рюгьнан тербияйин жавабдар тешкилатарин руководителар ва вари гъуллугъчйир рази шлу натижйир арайиз хри. Гъи ухьу ачмиш апIурайи ядигариз ихь гьюрматлу скульптори аьгъдарди жилижвуван къамат тувнадар. 1928-пи ва 1930-пи йисари Табасаран райондин гьар гъул’ан вуйи зигьимлу жигьилар кьюд йисандин мялимвалин курсар урхуз Темир-Хан-Шурайиз гьаънийи. Жигьил мялимари курсар ккудукIну гъюру вахтна, улихьна душну, ихь табасаранари дурар аьхю шадвалиинди къаршуламиш гъапIнийи. Таза мялимари Хючна, Ярса, Гумиъ ва жара гъулариъ мектебар ачмиш гъапIнийи», – ктибтнийи райондин кIулиъ айири.

Серенжемдиз дуфнайи хялар, гизаф йисари мялимди гъилиху зегьметнан ветеранар ва жарадар мяракайиъ удучIвну гъулхнийи. Ядигар дивбак аьхю пай киву, рягьимлувалин ляхниъ тафавутлу гъахьи, заан хъуркьувалар гъазанмиш гъапIу саб жерге мялимариз гьюкуматдин наградйир, гьюрматнан грамотйир тувнийи. Хъасин Табасаран райондин художественный самодеятельностдин коллективари гьязур гъапIу концерт кIули гъубшнийи. Мярака Мягьямед Къурбановди ва дуфнайи хялари мялимдиз бахш вуйи ядигарихъ кюкйир дивбиинди ккудубкIнийи.

Мяракайин кьяляхъ ич сюгьбатнаъ райондин образованиейин цирклиъ хайлин йисари ляхин гъапIу, гъи рягьятвал гъадабгъурайи РФ-дин образованиейин гьюрматлу гъуллугъчи Тажудин Мягьрамовди Мялимдин йигъаз бахш дапIнайи мяракайиз заан кьимат тувнийи.

«Гъи магьа, мялимарин машквраз вуди, гюрчег ригъ дапIнахьуз, ужудар хялар дуфна. Узуз мярака кIваантIан кьабул гъабхьунзуз. Гъи мушвахь дивнайи мялимдиз бахш дапIнайи ядигар, жямяаьтдин терефнаан мялимдихьна вуйи аьхю гьюрматнан лишан ву. Чухсагъул ихь скульптор Мирзабег Аьлимирзаевдиз, думу ухьуз айивализ. Думу дайиш, республикайиъ сабпи ражари вуди ихь райондиъ мициб гьядиса хьибдайи. Узуз аьгъязуз, му ляхин ккебгъбаз сифте чав Мирзабегди, хъасин Мягьямед Къурбановди ва ихь жумарт меценат Айваз Рамазановди хайлин ликар алдагъну. Чухсагъул ихь глава Мягьямед Къурбановдиз ва Айваз Рамазановдиз Мялимдин йигъаз мициб пешкеш апIбаз. Гъит гележегдиъ мялимдин ччвур гьаммишан варитIан заанди ибшри, дурарин маважибра за дапIну лихуз кьувват туври», – гъапнийи гьюрматлу мялимди.