Гъябгъюрайи йисан 15-пи апрели Хив райондиъ райондин главайин сечкйир кIули гъягъиди.

Мидкан цIиб улихьна Хив райондин депутатарин нубатнан сессияйи хабар тувну. Сессияйиъ къайд гъапIганси, гьамусяаьт райондин кIулиъ айи Ярмет Ярметовдин 8-пи апрели гъуллугъниин алди хьуд йис тамам шула.

18-пи мартдиан 4-пи апрелизкьан райондин главайин гъуллугъниинна кандидатурйир диврайи касарин документар кьабул апIиди. Хъа 5-пи апрелихъанмина дурар ахтармиш апIуз хъюгъди. Документарин гьякьнаан гъалатI адарди кьюбпи этапдихьна деету кандидатарин арайиъ 15-пи апрели тестирование ва комиссияйихъди вуйи сюгьбат кIули гъябгъиди. Комиссияйиъ шубур кас райондин гъарашугъарикан, хъа шубурсан меркездиан иштирак хьиди. Сюгьбатнаъ ва тестированиейиъ, заан баллар гъадагъну, ужударстар натижйир улупу 2-3 кандидатарин арайиан гьадму йигъан депутатарин сессияйин къарарниинди главара ктагъиди. СумчIурна шубур депутатдин арайиан 17 ва артухъ депутатари шлихъанди хил за гъапIиш, гьадму главара хьиди.

Фунур гъалиб гъахьишра, намуслуди лихури, Ватандин ва халкьдин гъуллугънаъ айир ишри учв.