Гюльнара Мягьямедова
Октябрин 1-пи йигъан Мягьячгъалайиъ наркотикар ва кIулин маълиз чIуру тясир тувру дармнар ишлетмиш апIбаз аьксивал улупбаъ динди ва диндин тешкилатари уйнамиш апIурайи ролиз бахш дапIнайи конференция кIули гъубшну.
Серенжемдиз Урусатдин хайлин регионариан диндин ва жямяаьтлугъ тешкилатарин вакилар, экспертар, къанун уьбхру органарин гъуллугъчйир ва жигьилар уч духьнайи.
РД-йин милли политикайин ва диндин ляхнариз лигру министрин заместитель Рафик Ханзаровди чан улхбаъ йислан-йисаз наркотикар тарагъувал артухъ шулайиваликан ва гьаму аьгьвалатнаъ диндин улихь хьайи вакиларин кюмек чарасуз вуйиваликан гъапнийи. «Гьамциб конференция ухди дубхнади ккундийи.
Саб терефнахъан, наркотикар тарагъувал гьяракатнаъ убчIвна, хъа тмуну терефнахъан, гъи жигьиларин фикриз жюрбежюр динарин вакиларин тясирлувал аьхюб дубхьна. Гъи наркотикар студентарин арайиъси, мектебариъ урхурайидарин арайиъра тарагъура. Улихьна йисари жямяаьтлугъдин арайиъ дийибгънайи учIру месэла ички ва тембеку вуйи. Мистар, килисйир, гьаврийир тикмиш апIуз хъюгъхъанмина, инсанар диндихьинди хайир кайиб илтIикIну, аьгьвалат дигиш гъабхьну. Гьамус наркотикар тарагъувал, дурар ишлетмиш апIувал артухъ дубхьна. Гъийин девриъ жигьиларин фагьум бадали нярс кьувватари яркьу ляхин гъабхура. Думу читин месэла гьял апIбаъ ихь вари дугъри кьувватар сатIи гъапIиш, ужудар дигиш’валар хьуз мумкин ву», – гъапну министрин заместители.
Мягьячгъалайин епархияйин вакил иеромонах Иоанди (Анисимовди) наркотикарин лукIвалиъ ахънайи касдиз кюмек тувну ккуниваликан гъапнийи. «Инсан чан жандин сагъвализ зарар тувбиин ваъ, хъа гьаммишан фу-вушра саб цIийиб хайир кайиб арайиз хувалиин машгъул духьну ккунду», – къайд гъапIнийи дугъу.
Дагъустандин муфтиятдин мярифатнан отделин кIулиъ айи Сяид Темигъишиевди, студентарихьна илтIикIну, дустар ктагъруган уччвуди фикир апIинай гъапнийи. «Ислам динди кучIал кьабул апIурадар, гьаддихъди сабси жвувазра кучIал апIуз гъитну ккундар», – къайд гъапIнийи муфтиятдин вакили.
Жугьдарин жямяаьтлугъдин вакил, республикайин «Ватан» газатдин кIулин редактор Моисей Аврумовдира чан улхбаъ сатIиди вуйи ляхнин важиблуваликан гъапнийи.
Конференцияйиъ удучIвну гъулху Урусатдин сагъламвалин министерствойин наркологияйин илимдин милли центрин наркологияйиъ профилактикайин кюмек тешкил апIбан отделин заведующий, психологияйин илмарин кандидат Евгения Фадеева, полицияйин майор, Урусатдин МВД-йин Ставропольский крайин ГУ-йин наркотикарихъди алвер гъабхрударин гюзчивал гъабхъбан управлениейин асас ляхнариз лигру оперуполномоченный Елена Краснояруженская, МВД-йин Дагъустан республикайиъ наркотикарихъди алвер гъабхбан гюзчивал гъабхру управлениейин профилактикайин отделин начальник Надежда Сейфудинова ва гь.ж. чпиз айи тажрубайикан, аьгъюваларикан мялуматар тувнийи.
«Республикайиъ наркотикарин тясирлуваликк ккахьнайи набаллугъарра кмиди гьисабнаъ а. Наркотикарикан асиллувалиан удучIвуз ккунди, наркоманар чпин хушниинди духтрарихьна тек-бирра илтIикIури шулдар. Дурар багахьлуйири хъади гъюру. Жямяаьтлугъдин терефнаанра кюмек лазим ву», – къайд гъапIнийи студентарихъди вуйи сюгьбатнаъ Надежда Сейфудиновайи.
Конференцияйи тасдикь гъапIганси, наркоманияйихъди женг гъабхбаъ къанун уьбхру органарира, диндин тешкилатарира, чпи жигьиларира сатIи ляхин дапIну ккунду.
