Гъачай аьлхъюхьа

Йиз гьисабариинди, ихь гъулаъ кавхавал гъапIну 7-8 касди: Беглерханди, Мислим, Наврузяли, Фаяз, Рамазну…

Саламдиз дуфну ккуни хяларин кьадарназ дилигну, гъул 2-3 пайназ жара апIуз хъюгъну. Гьамци, му йигъан кавха Наврузялди, хялар гъахрударин список aпIypy. Аьдат вуйиганси, гизафси хялар багахь хьайи Чювккен гъюри гъахьну. Десте-десте хъуркьрайи хялар пай апIурайи кавхайиз, читинвалар алахьуз хъюгъну: хялар гъахрударин список ккудубкIура, хъа чюв-ккерин дестйир ккудукIури адар. Аьхирки, учв чювккерин хтулра вуйиган, мурар чан гъавриъ ахъур дупну, хъубкьу сабсана чювккерин дестейиз кавхайи кIуру: «Учвуз гьамкьандариз шли гъач гъапнухъа?»

Дестейин кIули айири жаваб тувру: «Учкан инжиклу махьанай, дюаь дапIну, хътакрудар вуча».
Ваъ! Ваъ!», – гъапи кавхайи ва чан гъунши Сефербегаз вари десте хялар чан, Наврузялдин, хулаз гъахуз табшурмиш aпIypy. Амма, Сефербег улихь гьучIвнушра, хялар рази гъахьундар ва, сабсана дюаь дапIну, чпин гъулаз хътакну. Наврузяли, гьелбетда, фикрарик кахъру, ва дугъу ачухъди кIуру: «Тахсиркар вуза, гъуландар, узу мициб зарафат дапIну ккундайи».

Рюгьникк ккайи гъуштIларин аьхю агъсакъларизра, кавхайин зарафат кьабул гъабхьундайи. Хъасин мурар хъа саламдиз цIийи кавха ктагъбаз мясляаътназ гъюру. Му ляхникан аьгъю гъабши чювккер, гьуштIларин саламдиз цIибди гъюз хъюгъну. Артухъси гъафидарра, хулариъ дедрергди, хътакру аьдат ккебгъну. Хъасин чювккерин саламдиз гъушу гъуштIларра, уьлиз бисми дарапIди, хътакуз хъюгъну.

Гьамци, Наврузялдин «зарафатну» сурсатар кьяняаьт aпIpy цIийи аьдат адабгъну.

Шихмягьямад Гьямидовдин «ГъуштIил ва гъуштIлар» китабдиан, 106-пи маш.