Августдин 30-пи йигъан Дагъустандин Глава Сергей Меликов хусуси метлеб айи дявдин операцияйиъ гъуллугънан буржи тамам апIури гъийиху эскрарин багахьлуйирихъди гюрюшмиш гъахьну. Дидин гьякьнаан региондин главайин мялуматарин гъуллугъну хабар тувра.
Гюрюшдин эвелиъ Дагъустандин Главайи гьюкмин заан гъуллугъариъ айидарихъди сатIиди гъийиху эскрарин портретарин улихь кюкйир дивну ва дурарин багахьлуйириз башсагълугъвал ккун гъапIну. Сергей Меликовди къайд гъапIганси, я ужудар гафарихьан, ясана дюн’яйин девлетарихьан эскрарин багахьлуйирин хажалатнан учIврушин дябхъюз даршул, хъа вушра республика дурариз кюмекнан хил гьачIабккуз гьарган гьязур ву.
Гюрюшдиъ гьацира хусуси метлеб айи дявдин операцияйиъ иштирак шулайидариз региондин ва федеральный дережайиъди туврайи кюмекнан месэлйирикан гъулхнийи.
Серенжемдин аьхириъ Сергей Меликовди гъийиху эскрарин багахьлуйирихъди сюгьбатар гъухнийи, яшайишдин месэлйир гьял апIбаъ дурариз кюмек тувуз гаф тувнийи.
