Наргиз Гюлечова
Дагъустандин Къумтургъала райондин «Тюбе» ччвур тувнайи индустриальный майдандин аьтрафариин 2023-пи йисхъанмина интернетдиан шей’ар масу тувру ва гъадагъру тешкилат — OZON-дин аьхю склад тикмиш апIура. Тикилишчивалин ляхнар фици гъягъюраш ахтармиш апIбан метлеб ади, дина республикайин Глава Сергей Меликов гъушну.
Дупну ккундуки, 130 агъзур квадратдин метрин жилиин диврайи OZON-дин му склад, СКФО-йин регионариъ варитIан аьхюб ву. Мушваъ суткайин арайиъ заказар гъахру 1000 машиндин игьтияжар гьуркIуз ва агьалйирихьан гъюрайи швнуд-сад агъзур заказар тартиб апIуз мумкинвал хьибди. Проекдиз жара дапIнайи инвестицйирин кьадар 9,6 миллиард манат ву. Гъийин йигъаз объектдин тикилишчивалин ляхнариз 6,6 миллиард пулин дакьатар харж дапIна.
Проект республикайиъ кечирмиш апIбан бадали, 2023-пи йисан Санкт-Петербургдиъ гъябгъюрайи варихалкьарин экономикайин форумдиъ (ПМЭФ) Сергей Меликовди ва «Ромекс» компанйирин дестейин кIулиъ айи Алексей Прокопенкойи йикьрар гъийитIнийи. Гьаддихъан дишлади склад дивру йишв улупну, тикилишчивалин ляхнарихъ хъюгъну. БицIи вахтнан арайиъ объект саки вари инфракструктурайихъди тямин дапIну ккудубкIну, ва гъийин йигъаз душваъ хайлин жара ляхнарра кIули духна. Гьамусяаьт объектдиин душваъ гъягъюрайи ляхнарихъди Алексей Прокопенкойи Сергей Меликов таниш гъапIну ва проектдин гележегдикан гъапну.
«Ромекс» ГК-йин президентди туву мялуматариинди, проект кIулиз адабгъиган, мушваъ 2 агъзур лихру йишварра ачмиш апIиди. Гьацира интернетдиан вуйи ариш-веришчивалра швнуб-саб ражари за хьибди ва заказ гъапIу шейарра муштарйирихьна бицIи вахтнан арайиъ рукьиди.
«Гьамусяаьт тикилишчивалин ляхнар апIури, мушваъ 480 кас лихура. Дурар саки вари дагъустанлуйир ву. Янаки учу шлубкьан республикайин пишекрар ляхнихъди тямин апIуз чалишмиш шулача. Пуз ккундузузки, гележегдиъ республикайин гьясилдрариз чпи гьязур апIурайи шей’ар гьаму складдиан вари Урусат вуйибси масу тувуз мумкинвал шула.
Гьамусяаьт сабпи блок ачмиш апIуз гьязур шулача. Душван айтIан ляхнар аьхирихъна дуфна. АпIуз имбуб анжагъ йишв ккабалгуб ву. Хъа вари объект кIуруш, думу 2027-пи йисантIан ляхник кипуз шулдар», – гъапну Алексей Прокопенкойи.
Республикайин Главайи му аьхю проект Дагъустандин ругариин юрутмиш апIурайивализ чухсагъул гъапну.
«Проект Дагъустандиъ кечирмиш апIбиинди дидиз гизаф муштарйир шул кIури, умудлу вуза. Ковид уьзур ади, инсанар хул’ан удудучIврайи вахтна, интернетдиан шей’ар масу тувувал ва масу гъадагъувал Дагъустандиъ лап ужуди артмиш хьуз хъюбгъну.
Пуз ккундузузки, му жюрейиинди алвер апIувал – думу экономика «сирниккан» ккадабгъуз аьхю кюмек ву, ва гьаддиинди региондин налогар тувувалра артухъ хьибди», – гъапну Сергей Меликовди.
Гьаму йигъари, 18-20-пи июнди Санкт-Петербургдиъ кIулиъ гъябгъюрйи ПМЭФ-дин дахилнаъди Дагъустандинна OZON компанияйин арайиъ хайлин йисари сатIиди ляхин апIуз йикьрар йитIувал планариъ а. Думу интернет жюрейиинди вуйи ариш-вериш’валин инфраструктура артмиш апIуз аьхю кюмек хьибди, ва натижайиъ дагъустандин дилаварчйириз республикайин аьтрафариин гъулайди лихуз артухъ мумкинвалар хьибди..
