Гюльнара Мягьямедова

Урусатдин Федерацияйин Государствойин Думайи туризмдихъди аьлакьалу вуйи пишекарвал тувру колледжарин ва вузарин студентариз аттестация гъабхбан кьяляхъ экскурсоводарди ва гидарди лихуз ихтияр тувру къанундин проект кьюбпи ва шубубпи урхбаъди кьабул гъапIну. Къанундин цIийи проект 2025-пи йисан 1-пи сентябрилан кьувватнаъ убчIвру.

 

Думу къарар туриствалин цирклиъ пишекрар гьуркIри адрувалихъди аьлакьалу ву. Госдумайин туризмдин ва туриствалин инфраструктурайин артмиш’валин комитетдин председатель Сангьяжи Тарбаевди къайд гъапIганси, цирклиъ 250 агъзур пишекрарин кьитвал а. Думу аьгьвалат Урусатдин регионариз гъягъюрайи туристарин кьадар артухъ шулайивалихъди.

Ляхнихъ хъюгъру студентдин 18 йис яш дубхьнади ва дугъу экскурсоводдин, ясана гиддин ляхнин бина аьгъю апIру программа дурхнади ккунду. Аттестация гъабхувал образованиейин идарайи тешкил апIуру. Гьаци вушра, экскурсоводари ва гидари гьар хьуд йисак сабан чпин пишекарвалин аьгъювалар за дапIну ккунду.