Наргиз Гюлечова
24-пи январи, гьаму йисан сабпи ражари вуди, республикайин Халкьдин Собраниейин сессия гъабхьну.

Сессияйиъ иштирак духьнайи Дагъустан Республикайин МВД-йин ГИБДД-йин управлениейин кIулиъ айи Александр Шалагинди, ккудубшу йисан региондин рякъяриъ гъахьи хатIасузваларикан вуйи статистикайин мялуматар тувну.

Дугъан гафариинди, хатIа-сузваларин рейтингдиинди, гизаф аварйир хьувалиан инсанар йихбаз лигну, Дагъустан, Урусатдин регионарин арайиъ 5-пи йишв’ин ал. Ккудубшу йисан республикайин рякъяриъ 1677 аварйир гъахьну. Натижайиъ 348 кас гъийихну ва 2450 касдиз зийнар гъахьну. Рякъяриъ аварйир хьувал сесеб вуди, гъийихдарин арайиъ 29, хъа зийнар гъахьидарин арайиъ 233 кас 16 йис яшар дархьи бицIидарра а.

2013-пи йислан 2023-пи йисаз Дагъустандиъ 16 915 аварйир хьпан дюшюшар арайиз дуфна. ЙицIуд йисандин арайиъ рякъярин къайдйир дюрюрхди, гъахьи хатIасузваларин натижайиъ 4337 кас гъийихну ва 24 072 касдиз зийнар гъахьну. Гьадрарин арайиъ 16 йис яшар дархьиди гъийиху бицIидарин кьадар 297 , хъа зийнар гъахьидарин кьадар 2250 кас ву.

Ухьуз мялум вуйиганси, аварйир хувалин варитIан асас себеб рякъярин къайдйир уьрхюри адвувал ву. Гьаддиз рулихъ деъруган, сабпи нубатнаъди ичв уьмрикан фикир дапIну, хъа кьюбпибди, учIвуз хулаъ хизан ккилигурайиб фикриъ гъибтну, машин хъапIуз хъюгъяй.