Умгьанат Сулейманова
9-пи декабри ихь уьлкейиъ Ватандин Игитарин йигъ къайд гъапIну. Табасаран райондин мектебариъ думу йигъан хусуси метлеб айи дявдин операцияйиъ гъийиху 10 эскриз бахш вуди кIваин уьрхбан кьулар ачмиш гъапIнийи. Думу кьягьял баярикан сар, Хючнаарин 1-пи нумрайин лицейин выпускник, «КIубанвализ лигну» кьюб медалин сагьиб, аьхюну лейтенант Эльдар Исмяилов ву. 2025-пи йисан 22-пи сентябри Донецк Халкьдин Республикайин Великоновоселковский райондин ругариин садпидарди дявдин гьюжмиъ учIвру ротайин командир, аьхюну лейтенант Эльдар Исмяиловди, Украинайин ислягь халкь нацистарихьан азад апIури, чан жан фида гъапIну.
Игитрин гьюрмат уьбхюри, 9-пи декабри Хючнаарин 1-пи лицейин гьяятдиъ кIули гъубшу пашман мяракайиъ Табасаран райондин глава Мягьямед Къурбанов, Исмяиловарин кюлфетар, багахьлуйир, таниш касар, жямяаьтлугъ тешкилатарин вакилар, мялимар ва урхурайидар иштирак гъахьну.
Эльдар Исмяилов 2000-пи йисан 27-пи апрели Табасаран райондин ЖугътIил гъулаъ бабкан гъахьну. Дугъан абйир-бабар Эльдар бицIиди имидитIан Хючна гъулаз кюч гъахьнийи. Сабпи классдиз думу Хючнаарин 1-пи нумрайин мектебдиз гъягъюру. 2017-пи йисан мектеб ккудубкIну, Эльдар Новосибирск шагьриъ заан военный командный училищейиъ урхуз учIвру.
Урусатди Украинайиъ хусуси метлеб айи дявдин операция ккебгърайиган, Эльдари шубубпи курснаъ урхурайи. 2023-пи йисан январин вазли училище гьяракатниинди ккудубкIну, думу Украинайин аьтрафариин гъягъюрайи дявдин женгариз гъушну. Чан улихь дивнайи табшуругъар гьар ражари хъуркьувалиинди тамам апIбаз лигну, Эльдариз сацIиб вахтналан «лейтенант» ччвурра тувнийи.
Нацистарихьан азад гъапIу гьарсаб гъулаъ Эльдарин ротайиъ айи гизаф эскрари ислягьвал бадали чпин уьмрар тувну. Дустарихъ мягьрум хьувалин гъати учIврушин гьисс апIурушра, Эльдар Исмяиловдин хиялариъ «кьяляхъ гъягъюб» кIуру фикрариз йишв ади гъабхьундар. Дугъан метлеб Украинайин жиларилан нацистар марцци терг апIуб вуйи.
Эльдар Исмяилов чан хиликк ккайидарин гъайгъу зигру дугъри командирра вуйи. Думу дявдин тажруба адру эскрар гюллйирин хатIа айи йишварихьан уьрхюз чалашмиш шули гъахьну.
2024-пи йисан 27-пи июнди Прогресс гъулаъ дугъан гьюжум апIру рота варитIан читин женгариъ абхъру. Эльдарин хилиз, ликриз гъагъи зийнар шулу. Ифдиан духьнайи лейтенантди, чахъди женгнаъ айи эскрариз убгурайи машиндиан удучIвуз кюмек дапIну, дурар хатIасуз йишвазди адагъуру.
2025-пи йисан 27-пи майди Эльдар Исмяиловди Котляровка гъулан гъирагъдихъ гъелемар кивнайи багъдиъ жин духьнайи миномётариинди яракьламиш дапIнайи батарея ашкар апIуру ва дидкан дишлади ихь артиллерияйин полкназ хабар тувру. Душмнарин миномётар хьайи йишв бегьемди ккидипайизкьан, Эльдари, гюзчивал апIури ва аьгьвалатнакан хабар туври, артиллеристариз кюмек апIури гъахьну. Гьадмуган дугъан сабсан ражну ликрик кубкIру, ва Эльдар Исмяилов саб вазликьан кьушмарин аьзарханайиъ дахъну гъузру. Амма, хизанарин сакитвал уьбхюри, дугъу учв айи аьгьвалатнакан хулаъ айидариз ебхьуз гъитундар.
Эльдарин бабкан духьну 25 йистIан дубхьнадайишра, думу чан пишейиз гизаф вафалу кас вуйи. 2024-пи йисан офицер, эвленмиш духьну кьюб гьяфта улдубчIвиган, цIийикIултIан хусуси метлеб айи дявдин операция гъабхурайи йишваз кьяляхъ хътакуру. Гьяйифки, дугъхьан жвуваз хусуси хизан айивалин шадвал гьисс апIуз, ккунидарихъди мани гафар-чIалар апIуз саб бицIи вахтнатIан гъабхьундар.
Серенжемдиъ удучIвну улхрудари варидари Эльдар Исмяилов гизаф ужур, аькьюллу, аьхюр-бицIириз гьюрмат-гьязат айи жигьил вуйиб субут гъапIнийи ва дугъан адаш Агъамягьямаддиз ва дада Анайиз мицир жюрэтлу бай тербияламиш апIбаз чухсагъул гъапнийи.
