Гюльнара Мягьямедова
1-пи октябри Урусатдиъ жигьил баяриз военный гъуллугъназ дих апIбан чвлин призыв ккебгъну. Урусатдин Президент Владимир Путиндин указдиинди чвлин призывдин вахтна армияйиз 18 йислан 30 йис’ина яшар вуйи 135 агъзур кас душну ккунду. Призыв 2025-пи йисан 1-пи октябрилан 31-пи декабризкьан давам хьибди.
6-пи октябри «Дагъустан» РИА-йин конференцйир гъахру залиъ Дагъустан Республикайин военный комиссар, полковник Аьбдурягьман Мурадханов ва Дагъустандиъ военный гъуллугъназ ватандашар гьязур апIбан ва дих апIбан отделин начальник, подполковник Гьюсейн Уьмаргьяжиев республикайин журналистарихъди гюрюшмиш гъахьнийи.
Аьбдурягьман Мурадхановди сифте хьадукран призывдин натижйирикан мялуматар тувнийи. «Урусатдин Президент Владимир Путинди хьадукран призывдин вахтна Дагъустан Республикайин улихь дивнайи план тамам гъапIнийи. Урусатдин Яракьлу кьувватарин ва жара кьушмарин жергйириз гъуллугъ апIуз Дагъустандиан 3730 ватандаш гъушнийи», – къайд гъапIнийи республикайин военный комиссари.
Аьбдурягьман Мурадхановди ктухурайи, ужуб тешкиллувалиинди призывдин серенжемар гъуху районарин арайиъ Дагъустандин Огни шагьур ва Табасаран районра айи.
Чвлин призывдикан улхури РД-йин военный комиссари къайд гъапIганси, Урусатдин Федерацияйин къанундиъ улупнайибдиз асас вуди, дявдин гъуллугъназ 1995-2007-пи йисари бабкан гъахьи ватандашар гъягъиди. «Армияйиъ эскервалин гъуллугъ гъабхру вахт, улихьна айиси, 12 ваз ву. 5-пи октябрилан башламиш дапIну, республикайин призывникар уч шлу пунктнаан, призывникар Яракьлу кьувватарин кьушмар ерлемиш духьнайи йишвариз гьауз хъюгъди.
Къайд апIураза, призывдиинди эскервалин гъуллугъназ дих дапIнайи ватандашар хусуси метлеб айи дявдин операцияйин месэлйир гьял апIбаъ иштирак хьидар. Призывникарин шубуб пайнакан саб пайтIан цIиб дарди урхбан эскервалин частариз гьаъди. Душвариъ призывникар гьамусдин деврин дявдин текхникайихъди таниш апIиди, дурари военный гъуллугънаъ лазим шлу пишекарвал гъадабгъиди. Урхуб ккудубкIбан кьяляхъ дурар кьушмарин жергйириз гьаъди», – гъапнийи военный комиссари.
Чвлин призывдин кампания, гьюкуматдин «Кьушмар гьисабназ гъадагъру сиягь» мялуматарин гъурулуш ишлетмиш апIури, кIули гъабхура. Думу Урусатдин Федерацияйин армияйиз гъягъру ватандашар гьисабназ гъадагънайи, военный комиссариатариз ишлетмиш апIуз ихтияр айи база ву.
Призывникариз, кагъзин повесткйирси, электрондин повесткйирра хътаиди. Эгер призывник чаз улупнайи вахтна военный комиссариатдиз (хил алдабгъру себеб адарди) дарфиш, 20 йигъ улдубчIвбан кьяляхъ «Военный жавабдарвалин ва военный гъуллугънан гьякьнаан» Федеральный къанундиз асас вуди, вахтназ вуйи гъадагъа апIбан уьлчмйир кьабул гъапIну.
Уьлкейин гьюкмари ярхи йисди, 1-пи январилан 31-пи декабризкьан вуйи призыв кьувватнаъ ипуз планар йивура. Дидин гьякьнаан сентябрин аьхириъ Госдумайи сабпи урхбаъди къанун кьабул дапIна. Думу вахтнан арайиъ повесткайиинди военкоматдиз гъафидаригъян пишекрар гъядягъиди, духтрари военный гъуллугъназ гъягъюрайидарин бедендин ва фагьмин сагъламвал ахтармиш апIиди, хъа гъуллугъназ гьаъбан ляхин, улихьнаси, хьадукра ва чвну гъабхурди гъубзди.
Аьбдурягьман Мурадхановди чан улхбан аьхириъ къайд гъапIганси, призывдиинди гъуллугъ дапIну ккудубкIу ватандашар вахтниинди чпин хулариз гьаъди.
