Зубайдат Шябанова
Гъябгъюрайи йисан 6-пи мартди Табасаран райондин глава Мягьямед Къурбановди Хючна гъулаъ Культурайин хулаъ райондин депутатарин Собраниейин заседаниейиъ чан хьуд йисандин ляхнин натижйирикан доклад гъурхну.
Главайин докладдин асас месэлйир райондиъ 2019-2023-пи йисари сациалинна экономикайин цирклин артмиш’валикан ва 2024-2028-пи йисариз диврайи метлебарикан вуйи. Гьацира дугъу образованиейин, сагъламвалин, культурайин, спортдин ва жара цирклариъ гъуху ляхнарин натижйир арайиз адагъну.
Заседаниейиъ РД-йин Халкьдин Собраниейин депутат Алавудин Мирза-балаев, РД-йин Жямяаьтлугъ палатайин вакил Низами Аскаров, Кафари Кавказдин халкьарин агьли касарин Советдин вакил Зейдулла Юзбегов, Табасаран райондин идарйирин ва тешкилатарин кIулиъ айидар, жямяаьтлугъ вакилар айи.
Главайи къайд гъапIганси, райондиъ гьял дапIну ккуни месэлйирикан вартIан важиблудар рякъяр къайдайиз хуб, убхъру штухъди аьлакьалу месэлйир гьял апIуб, образованиейин идарйир рас апIуб, инсанар гизаф уч шлу йишвар ккабалгуб вуйи.
Мягьямед Къурбановдин гафариинди, аьхиримжи хьуд йисандин арайиъ Табасаран райондин артмиш’вализ ва мублагъди ккабалгувализ 3 миллиард манат харж дапIна.
Думу пуликан саки 1,6 миллиард манат рякъяр рас апIбаз гъубшну. Думу дакьатарин кюмекниинди райондин рякъярин мяишатдин 163 объект ва 213 километр рякъ рас апIуз, гьадму гьисабнаан 100 километр рякъяриин асфальт улубзуз мумкинвал гъабхьну.
Мидлан гъайри, райондиъ 46 мектеб, 11 бицIидарин багъ бинайиан рас дапIна. Думу дараматар къайдайиз хуз 1,1 миллиард манат харж гъабхьну. Гьацира «Культура» милли проектдин бинайиинди аьхиримжи 5 йисан райондиъ культурайин 18 дарамат ва сагъламвалин цирклиъ 28 дарамат рас гъапIну.
Спортдин цирклизра райондиъ аьхю фикир тувра. Гьаци 2019-2023-пи йисари спортдин 76 тикилиш ва футболинна волейболин майднар къайдайиз гъахну.
Зиихъ кудухнайи йисари Табасаран райондиъ 15 сквер, хайлин булагъар ва жямяаьтлугъ йишвар мюгькамди ккабалгну. Булагъар рас апIбакан улхури, райондин главайи гележегдиъ Ярса, Зил, СиртIич ва жара гъулариъ убхъру штухъди аьлакьалу месэла гьял дапIну ккуниваликан гъапнийи.
Мягьямед Къурба-новди къайд гъапIганси, 2024-пи йисан гьяракатнаъ айи вари проектар давам апIиди. Гьадму гьисабнаан гъулар марцци штухъди тямин апIбан, республикайин мяна айи Дербент–Хючна–Хив машинарин рякъ, федералин мяна айи Кавказ–СиртIич–ТатIил машинарин рякъ ва хайлин гъулариз вуйи рякъяр къайдайиз хпан, сагъламвалин цирклиъ райондин гъулариъ модулин ФАП-ар дивбан, Хючна гъулан поликлиника ва духтрарин амбулаторйир рас апIбан, Хюрикк, Туруф, Жулжагъ, СертIил, Гюгьрягъ гъулариъ мектебар тикмиш апIбан ляхнар аьхирихъна хиди, Хючна гъулаъ асас парк ва административ дараматар рас апIбан ва гьацира жара ляхнар дамам апIиди.
