Гюльнара Магомедова
Табасаран райондин глава Мягьямед Къурбанов 14-пи майди Мягьячгъалайиъ Расул Гьямзатовдин ччвурнахъ хъайи Дагъустандин гьюкуматдин педагогвалин университетдиъ урхурайи муниципалитетдиан вуйи студентарихъди гюрюшмиш гъахьну. Гюрюшдиъ ДГПУ-йин ректор Нариман Асваров, проректор – образованиейин ерийиз кьимат тувру управлениейин кIулиъ айи Мурад Рашидов, Табасаран райондин образованиейин управлениейин начальник Аьбдусалам Гьясанов, тарихдин илмарин доктор, Урусатдин Федерацияйин ва Дагъустан Республикайин илимдин лайикьлу гъуллугъчиМягьямед Гьясанов иштирак гъахьнийи.
Уч духьнайидарин улихь, серенжем ачмиш апIури, вуздин ректор Нариман Асваров удучIвну гъулхнийи, хъасин Табасаран райондин кIулиъ айириз гаф тувнийи. Мягьямед Къурбановди аьхиримжи хьуд йисандин арайиъ муниципалитетдин образованиейин цирклиъ дапIнайи ляхнин натижйирикан ктибтнийи.
«Райондиъ цIийи мектебар тикмиш апIура, гизаф мектебариъ расвалин ляхнар кIули духна, мектебар деврин тIалабариз жаваб шлу техникайихъди тямин дапIна. Саб гафниинди, мялимариз ляхин апIуз ва урхурайидариз аьгъювалар гъадагъуз вари шартIар арайиз хура.
Мектебдин ккудукIру классариъ урхурайидариз Табасаран райондин главайин грант тяйин дапIна. Учу гьацира райондиъ гьар йисан Зейдула Юзбеговдин ччвурнахъ математикайиан олимпиада гъабхурача. Думу олимпиадайин гъалибчйир пулсузди Москвайиз МГУ-йиз экскурсияйиз гьаърача», – къайд гъапIнийи Мягьямед Къурбановди.
Чан улхбаъ муниципалитетдин кIулиъ айири райондин мектебариъ мялимариз айи лихру йишвариканра ктибтнийи. Дугъу студентариин улихь, вуз ужуди ккудубкIну, райондин мектебариз ляхин апIуз гъюбан теклиф дивнийи, дурариз райондиъ гьяракатнаъ айи «Земский мялим» программайиканра ктибтнийи.
Мягьямед Къурбановди гьарсар студентдин суалназ дикъатлуди фикир тувнийи ва гюрюшдиз дуфнайи студентариз чухсагъул мялум гъапIнийи.
«Жигьил насларихъди гьамцдар сюгьбатар гъахувалин аьхю мяна а. Жигьилари жвуван багъри Ватандин гележегдин артмиш’валик пай кивувал важиблу ву», – къайд гъапIнийи гюрюшдин аьхириъ Мягьямед Къурбановди.
