Гюльнара Мягьямедова
Магьа лап багарихьди гирами Рамазандин ваз улубкьура. Дагъустандиъ думу вазлин улихь «Рамазан ва сагъламвал» кIуру рягьимлувалин акция кIули гъябгъиди. Думу акцияйин метлеб ушвар дидиснайи вахтна дишди ушв гьибтуз аьгъю апIуб, сахарный диабет уьзур кайидарин уьзур гъати дархьбан бадали, дурариз духтрарин теклифарикан мялуматар тувуб ву.
Гьаму акция февралин 5-пи йигъан ккебгъра, думу республикайин вари муниципальный образованйириъ кIули гъябгъиди. Серенжемар Дагъустандин муфтиятдихъди ва республикайин сагъламвалин министерствойихъди сатIиди Илимдинна ахтармишарин биомехатроникайин институтди уьмриз кечирмиш апIура.
Илимдинна ахтармишарин биомехатроникайин институтдин кIулиъ айи Мягьямад Мягьямадовди (шиклиъ) къайд гъапIганси, ватандашариз диабет уьзрикан дерин мялуматар адар. Гирами Рамазандин вазли думу уьзур кайидариз, медицинайин улупбариинди, ушвар дисуз ихтияр адар. Гъи ихь республикайиъ сахарный диабет уьзур кайи 45 агъзур кас яшамиш шула, гьаци вушра, Рамазандин вазли дурарикан аьхюну пайну ушвар дисура. Духтрари туврайи мялуматариинди, сар диабетикдин кIул’ина, чпин гьялнакан хабар адру, диабет уьзур артмиш шуз хъюгънайи 2-3 кас алахьура.
«Рамазан ва сагъламвал» акция уьмриз кечирмиш апIбан бадали, региондин медицинайин вари пунктар ифдик кайи сахарин кьадар аьгъю апIуз шлу гьамусдин деврин техникайин оборудованиейихъди тямин апIиди. Биомехатроникайин НИИ-йи региондин медицинайин идарйириз пулсузди 800 глюкометр, 140 агъзур тест-полоскйир ва илтIикIу касдин ифдик кайи глюкоза ебцру ланцетар, гьаммишан глюкозайин гъаравлиъ дийигъру гъурулушар тувбанди ву.
Акцияйин дахилнаъди вари республикайиъ медицинайин центрари ляхин апIиди, хъа мистариъ, ушв дибиснайи вахтна инсандин сагъламвалин аьгьвалатнахъди аьлакьалу месэлйирин гъаврикк ккауз шлу медицинайин гъуллугъчйири дежурство тешкил апIиди .
2026-пи йисан 5-пи феврали зиихъ серенжемдиз бахш вуди акцияйиз «Рамазан ва сагъламвал; ушв дибиснайидарин сахарный диабетдин профилактика» гергми стол кIули гъябгъиди.
Акцияйикан ва республикайиъ тарабгънайи сахарный диабетдикан яркьу мялуматар газатдин гъюру нумрайиъ тувдича.
