Гюльнара Мягьямедова
2023-пи йисан 8-пи сентябриъ хябяхъган сяаьт 6-диъ Мягьячгъалайиъ Урус драмайин театрин сягьнайиин машгьур шаир Расул Гьямзатов бабкан духьну 100 йис тамам хьпаз бахш вуди «Инсанар, инсанар – ягъал хядар…» кIул тувнайи музыкайинна театрин сягьна кIули гъябгъиди. Серенжем Урусатдин Президентдин культурайин теклифарин фонднан кюмекниинди «Расул Гьямзатовдин булагъар» культурайин проектдин дахилнаъди гъабхурайиб ву.
8-пи сентябрь хабарсузди ктабгъу йигъ дар. Думу йигъан вари ихь уьлкейи халкьдин шаир бабкан духьну 100 йис тамам хьувал къайд апIура. Серенжемдин важиблувал Урусатдин Федерацияйин Президент Владимир Путинди 2021-пи йисан 1-пи июлиъ адабгъу Указди субут апIура.
Урус драмайин театриъ гъябгъру сягьнайин асас метлеб – художествойин урхувалиинди ва гьамусдин деврин техникайин хъуркьуваларин кюмекниинди дюн’я машгьур шаирин улариинди улупувал ву. Концерт Расул Гьямзатовдин уьмрин рякъюъди «уьмрин китабдиинди» гъягъюрайиси албагна. Китабдин гьарсаб маш – уьлкейин тарихдихъди сигъ аьлакьа айи шаирин биографияйин важиблу пай ву.
«Дагъустан» РИА-йин пресс-конференцйир гъахру залиъ РД-йин культурайин министр Зарема Бутаевайи журналистарихъди вуйи гюрюшдиъ мялум тувганси, Мягьячгъалайиъ Урус драмайин театрин сягьнайиин концертдин программайиъ шаири гъидикIу, варидариз хуш вуйи мяълийир, гьацира литературайин эсерар Дагъустан Республикайин яратмишарин коллективари, Урусатдин халкьдин ва лайикьлу артистар вуйи Дмитрий Дюжевди, Аскар Аьбдурзакьовди, Зарайи, Сергей Волчковди, ТIагьир Курачевди, Аьдил Уцумуевди, Салман ва Белек Абасовари, Хиринду Султановайи, Денис Федоренкойи ва гьацдар жарадари тамам апIиди. Хъа концерт кIули гъабхрудар Екатерина Гусева ва Михаил Морозов ву.
РД-йин культурайин министри гъапиганси, сягьнайиз лигуз ккуннидарин кьадар аьхюб ву, хъа Урус драмайин театриъ дурар вари сатIи апIуз даршлувализ дилигну, Урус театрин улихь ва Авар театрин аьтрафариин сягьна рябкъру кьюб экран керхди. Дагъустандин машгьур шаир бабкан духьну 100 йис тамам хьувал къайд апIбахъди аьлакьалу вуди, «Инсанар, инсанар – ягъал хядар …» музыкайинна театрин сягьна Москвайиъра улупиди. Хъа Санкт-Петербургдиъ, Белорусияйиъ, Азербайжандиъ, Узбекистандиъ ва Киргизия Республикайиъ «Расул Гьямзатовдин булагъар» культурайин проектдин дахилнаъди халкьдин сяняаьткарвалин, яратмишарин выставкйир, мастер-классар ва «гергми столар» кIули гъягъиди.
Гьюрматлу ватанагьлийир ва шагьрин хялар!
Мягьячгъалайиъ 8-10-пи сентябриъ Расул Гьямзатовдин 100 йис тамам хьпаз бахш дапIнайи «Ихь Расул» кIул тувнайи художествойин яратмишарин фестиваль кIули гъябгъиди.
Серенжем РД-йин культурайин министерствойи, Мягьячгъала шагьрин администрацияйин культурайин управлениейи, Республикайин халкьдин яратмишарин хулахъди сабси тешкил дапIна.
Фестивалин программайиъ лисхъан сяаьт 2-диан йишвну сяаьт миржибдизкьан шадлугънан серенжемар кIули гъягъиди: «Расулин шикил зигурхьа» арт-майданар, халкьдин сяняаьткарвалин устадарин майднар, «Шаирин микрофон» майдан, «Ачухъ библиотека» китабарин выставка, «Йиз Расул» театрин яратмишарин майдан, Къ.А. Къурбановдин ччвурнахъ хъайи циркдин искусствойин республикайин мектебдин пягьливнарин майдан, спортдин талитар.
Расул Гьямзатовдин ччвурнахъ хъайи кючейиъ Урусатдин халкьарин аьдати культурйирин гьяятар ачмиш апIиди. Душваъ милли палтарин, музыкайин алатарин, милли хурагарин выставкйир, фольклорин коллективарин мяълийирин ва ялхъвнарин мяракйир хьиди. Халкьдин сяняаьткарвалин мастер-классариъ иштирак хьуз ккунидариз варидариз мумкинвал тувди.
Лисхъан сяаьт 3-диъ Мягьячгъалайиъ Авар театрин улихь шаирин юбилейиз бахш дапIнайи халкьдин яратмишарин «Урусатдиин къарнийир» фестиваль кIули гъябгъиди.
Расул Гьямзатов бажаранлу шаирси, ватанперверра вуди гъахьну. Дугъан эсерар хил ктарди диву ядиграр, Урусат сатIи апIурайи лишнар гъахьну.
Машквриъ Мягьячгъала, Избербаш, Къизляр, Дербент шагьририн, Ахъуша, Леваши, Хасавюрт, Дербент районарин халкьдин коллективар, ансамблийир, ялхъвнар апIру дестйир, гьацира ЧIарадайин гьюкуматдин халкьдин жиларин «Мяълийир апIурайи ЧIарода» хор иштирак хьиди.
Учвуз варидариз юбилейин серенжемариъ иштирак хьуз теклиф апIурача.
