Наргиз Гюлечова

Цци «БицIи кьарни» кIуру бицIидарин литературайин клубдин 10 йисандин юбилей къайд апIбанди ву. Гьамдихъди аьлакьалу вуди, улихьна йигъари Расул Гьямзатовдин ччвурнахъ хъайи литературайин музейдиъ клубдин ляхнариъ жанлуди иштирак шулайи бицIидариз пешкешар тувбан серенжем гъабхьну. Р. Гьямзатовдин ччвурнахъ хъайи варихалкьарин фонднан президент, шаирин риш Салигьят Гьямзатовайи клубдин иштиракчйир улубкьурайи юбилейихъди тебрик гъапIну.

 

«БицIи кьарни» литературайин клубдин улубкьурайи 10 йисандин юбилейихъди аьлакьалу вуди, дидин кIулиъ айи ихь ватанагьли, Каспийск шагьрин 15-пи нумрайин мектебдиъ лихурайи Сейранат Аьбдуллаева, жямяаьтлугъдин арайиъ гъабхурайи ляхниз лигну, Расул Гьямзатовдин ччвурнахъ хъайи варихалкьарин фонднан гьюрматнан награда – Расул Гьямзатовдин юбилейин медалиинди лишанлу гъапIну.

«Дагъустандин писателарин союздиз дахил шулайи «БицIи кьарни» клуб, республикайин писателарин союзди тешкил апIурайи гьарсаб серенжемдиъ иштирак шула. Гьамусяаьт клубдиъ 6 йислан 18 йис’ина яшар духьнайи бицIидар ва живанар а. Дурарикан хайлиндари чпи шиърар дикIура, гизафдариз шиърар ужуди урхуз аьгъя.
Цци Дагъустандин писателарин союздин 90 йис тамам шула. Гьамдихъди аьлакьалу вуди бицIидарин «БицIи кьарни» литературайин клубди «Поэзияйин балхун» кIуру проектра кIули гъабхбанди ву. Думу проект асас вуди республикайиз туристар гъюру вахназ гьязур апIидича, ва клубдин иштиракчйири машгьур шаирар ва писателар бабкан гъахьи йигъари гьадрарин яратмиш апIбарикан балхундихъан кдибтиди», – мялум гъапIну Сейранат Аьбдуллаевайи.

«Расул Гьямзатовдин юбилейин медаль тувбан бадали кIури узуз дих гъапIган, думу серенжемдиз шаирин ччвур али 4 йисандин яшнаъ айи йиз худул Расулра хъади гъушунза. Му серенжемдиъ Расули бабаз ва дадайиз бахш дапIнайи шиърарра гъурхну.
Пуз ккундузузки, йизси, йиз худлинра бицIиди имидитIан поэзияйихьна ккунивал айиб рябкъюра…», – аьлава гъапIну Сейранат Аьбдуллаевайи.