Наргиз Гюлечова
3-пи феврали Дагъустандин туризмдинна халкьарин художествойинна сяняаьткарваларин министр Эмин Мерданов, республикайин заргарчйирихъди ва халкьдин художествойин сяняаьткарвалин устадарихъди гюрюшмиш гъахьну. Серенжемдин асас метлеб халкьдин художествойин сяняаьткарвалар уьрхбаз ва артмиш апIбаз гьюкуматдин терефнаан кюмек тувуб ва му цирклиъ алахьурайи читин месэлйир гьял апIбан рякъяр агуб вуйи .
Къайд апIуб лазим вуки, республикайиъ аьхиримжи йисари туризм ужуди артмиш шулайивализ лигну, халкьарин сяняаьткарваларин шей’аризра артухъди фикир тувуз хъюгъна. Мидиз чан мянара а – республикайиз гъюрайи туристарикан халкьарин сяняаьткарвалин шей’арихъди таниш хьуз, дурарикан артухъди мялуматар агуз ккунди айидарин кьадар цIиб дар.
Чан улхбаъ министр Эмин Мердановдира Дагъустандин аьдатар, халкьарин художествойин сяняаьткарвалин шей’ар уьрхбакан, дурар артмиш апIуз кюмек тувну ккуниваликан ва му цирклиъ ляхин апIурайи касари гьюкуматдихъди ва бизнесдихъди мянфяаьтлу аьлакьа дюбхну ккуниваликан гъапну.
Мидланра савайи, циркил артмиш апIбаъ устадарин фикрарра гьисабназ гъадагъуб чарасуз ву, фицики гьарсар устадриз, чав гьязур апIурайи шейъ ужуб хьпан бадали, думу фу жюрейиинди гьязур дапIну ккундуш, аьгъя.
Серенжемдиъ туризмдинна халкьарин художествойин сяняаьткарвалин шей’арин министрин заместитель Анна Безруковайи уч духьнайидариз, циркил артмиш апIбаз гьюкуматдин терефнаан туврайи кюмекнаканра ктибтну. Дугъан гафариинди, цирклиъ ляхин апIурайи устадарин удучIвурайи харжариз ва апIурайи ляхнариз кюмек вуди, республикайин бюджетдиан субсидйир тувра. Субсидйир гъадагъбан бадали, халкьарин художествойин сяняаьткарвалин устадарин реестр тешкил апIура. Гьамусдихъантина субсидйир анжагъ гьадму реестрин дахилнаъ айи устадаризтIан тувидар. Хъа реестриъ учIвбан бадали, РД-йин художествойинна экспертдин советди экспертиза дубхну, устйир халкьарин художествойин сяняаьткарваларин шей’ар гьязур апIурайи устадар вуйивал тасдикь апIуб чарасуз ву.
Къад дапIну ккундуки, гъи региондин дережайиъди реестриъ учIву халкьарин художествойин сяняаьткарваларин устадариз федеральный дережайиз удучIвузра мумкинвал шула. Вари уьлкейин дережайиз удучIвбан кьяляхъ, халкьарин художествойин сяняаьткарваларин месэлйир гьял апIру центрин пишекрари гьарсар устадрихъди гаф-чIал дапIну, дурариз гьюкуматдин терефнаан фицдар кюмекар аш ва гьаруриз, чпин сяняаьт артмиш апIбан бадали уьмриз кечирмиш апIуз ккундайи проектар фу жюрейииинди гьял дапIну ккундуш, ктибтура. Реестриъ карханйиризси, кIул’инди лихурайи физический касаризра учIвуз мумкинвал а, думуган дурари чарасуз вуди чпи апIурайи ляхнихъан налог тувну ккунду.
Му гюрюшмишдиъ Хив райондин ВертIил гъулан агьали, райондин депутат, халачйирихъди ляхин апIурайи Айдемир Рамазановра иштирак духьнайи. Думу чан гафариинди, серенжемдиъ министрин теклифниинди иштирак гъахьир ву.
«Министерствойихъдиси, министрихъдира ужудар аьлакьйир айиз. Дугъу узуз, халкьарин художествойин сяняаьткарвал уьбхюри, циркил артмиш апIурайи кас ва райондин собраниейин депутатра вуйивализ лигну, хъа гьацира Табасаран ва Хив районарин главйирихъдира аьлакьйир айивалиан дих гъапIнийи.
Ав, Ярмет Аьлиметовичдира, Мягьямед Сиражутдиновичдира узу апIурайи ляхниз чухсагъул кIура ва гьаммишан кюмек апIузра рази ву, фицики гъи районарин дережайиъди шулайи серенжемариъ узу аьшкьниинди иштиракра шулаза ва узхьан шлу кюмекра апIураза. Мисал вуди гъадабгъиш, Табасаран райондин 95 йисандин юбилей шлуган, гьюрматлу хялариз пешкеш вуди, кусрийириин илирчру райондин логотип али халачйир урх кIури, узуз теклиф гъапIнийи. БицIи вахтнан арайиъ думу ляхин кIулиз адабгънийза. ИкибаштIан, думу лап ужуб пешкеш ву. Жвуван хилариинди дапIнайи сяняаьткарвалин шей’ар багъиш апIуб – му жвувазра, пешкеш гъадабгъурайизра хуш шлу ляхин ву.
Кьюбрид районарихъдира сатIиди ляхин апIурайиваликан ва главйирира узуз кюмек туврайиваликан узу министризра ктибтунза. Чан терефнаан дугъу узуз табасаран халкьдин сяняаьткарвалин циркил артмиш апIбаз ва уьбхбаз чухчагъул гъапну ва лазим вуйи кумек апIузра гаф тувну.
Пуз ккундузкзки, му ляхин узу бадали апIурайиб дариз. Асас метлеб ихь халкьдин сяняаьт дудрубгуб ва думу гъюз имбу насларихьна рубкьуб вуйиз», – кIура Айдемир Рамазановди.
