Зубайдат Шябанова

Гьаму йигъари Табасаран райондин глава Мягьямед Къурбановдин табшуругъниинди вари райондиъ субботник тешкил гъапIну. Район зир-зибилихьан марцц апIбан ляхнариъ тешкилатарин, карханйирин гъуллугъчйир, мектебариъ урхурайидар ва мялимар, ва гьацира вижнасуз дару касар иштирак гъахьну.

Субботникдиъ иштирак шулайидари райондин паркар, административ ва жямяаьтлугъ идарйирин аьтрафар, тротуарар, рякъяр, кючйир чIюрхярихьан ва хъархъвсарихьан марцц гъапIну, рякъярин гъирагъдихъди хъивнайи бордюрариз гьяк гъивну. Гьарсаб идарайиз, дурарин вакилари къайдайиз дубхну ккуни йишв кьатI’иди улупнайи.
Субботникдин дахилнаъди райондин гъулариъ рякъярихъди уч дапIнайи хъархъвсарин урсларра марцц гъапIну. Му ляхниз техникара жалб дапIнайи.

«Субботникар тешкил апIбиинди, ухьу райондин агьалйир ихь аьтрафарихъ хъайи табиаьтдин марццишин уьбхбахьна гьевеслу апIурахьа, ихь табиаьт уьбхбахьна дурарин жавабдарвалин гьиссар артухъ апIурахьа. Ухьу ихь кючйирин, паркарин, жямяаьтлугъ йишварин марццишин дюбхну ккунду.
Гъулан марццишин райондин сурат ву. Райондиъ къанунсузди арайиз хурайи урслар духьну ккундар. Райондин гьарсаб гъулаъ ТКО уч апIру йишвар улупна. Гьадушвлан хъархъвсар асас урслиина гъахура. Ухьхьан сатIиди ихь район марцц апIуз ва кюкюси адабшвуз гъитуз шулухьан. Хъа му важиблу ляхник гьарсар агьалийихьан чан пайра кивуз шулу»,

— къайд гъапIнийи Мягьямед Къурбановди.