Гюльнара Мягьямедова
Апрелин 24-пи йигъан Дагъустандин Правительствойин председатель Аьбдулмуслим Аьбдулмуслимовдин жягьтлувалиинди республикайин «Гъалибвал» тешкиллувалин комитетдин Ватандин Аьхю дявдиъ гъалибвал гъадабгъну 79 йис тамам хьпаз бахш дапIнайи Гъалибвалин параддиз гьязурлугвалар гъахбан заседание кIули гъубшну.
Заседание ачмиш апIури, Аьбдулмуслим Аьбдулмуслимовди къайд гъапIганси, республикайин кIулиъ айи Сергей Меликовдин табшуругъниинди му ляхнарин план гьязур дапIна. Пландиз асас вуди, Дагъустандиъ 50-рилан зиина чIатху серенжемар гъахиди, гьадму гьисабнаъди «Гьюрматнан вахта», Гъалибвалин парад, «Кавказ бадали женг» тарихдин реконструкцияйин фестиваль ва жарадар. Муниципалин районариъ ва шагьрарин округариъ Гъалибвалин 79 йисаз бахш вуйи спортдин серенжемар, фестивалар, концертар тешкил апIиди.
Заседаниейиъ 9-пи майди Каспийскдиъ гъябгъру военный параддиз гьязурлугвалар гъахбакан Каспийский флотилияйин командующийин заместитель Сергей Ракаускасди ктибтнийи.
Военный параддин репетиция 7-8-пи майди сяаьт 10-диан лисхъандин сяаьт 1-дизкьан давам хьибди. Хъа машкврин 9-пи Майдин йигъан шагьрин агьалйириз ва хялариз артиллерияйин яракьариан ва салютар деетру гъурулушариан салютар деетиди.
Гъийин йигъаз Дагъустандиъ Ватандин Аьхю дявдин 10 иштиракчи яшамиш шула. Дурариз федеральный ва республикайин къанунариинди аьлава вуди улупнайи яшайишдин кюмекар вахтниинди тувра.
2023-пи йисан Ватандин Аьхю дявдин иштиракчйириз машкврин йигъан улихь саб ражари тувру 360 агъзур манат пул тувнийи. Гьаму йисанра ветеранариз гьадму кьадар пул тувди.
Саб гъварч табшуругъариин къулар дизигну, Аьбдулмуслим Абдулмуслимовди вице-премьер Рамазан Жяфаровдиз Каспийск шагьриъ Гъалибвалин Парад гъабхру вахтна хатIасузвал тямин апIбан месэлйир асас гюзчиваликк уьрхюб табшурмиш гъапIнийи.
***
25-пи апрелиъ Республикайин краеведар-следопытарин дестйирин 53-пи слетдин дахилнаъди республикайин «Гьюрматнан вахта» кIуру ватанпервервалин акция кIули гъубшну. Акцияйин метлеб Ватандин Аьхю дявдиъ гъийиху эскрарихьна вуйи гьюрмат улупуб, жигьилариз ватанпервервалин тербия тувуб, жигьилар Урусатдин тарихдин ва культурайин ирснахьна багахь апIуб ву.
