Гюльнара Мягьямедова
8-пи октябри Мягьячгъалайиъ Дуствалин хулариъ террориствализ аькси республикайин форум ачмиш гъапIну. Думу 11-пи октябризкьан давам хьибди.
Форум РД-йин НАК-дин Аппаратдин ва АТК-йин Аппаратдин кюмекниинди Дагъустан Респуб-ликайин милли политикайин ва диндин ляхнариз лигру министерствойи тешкил дапIнайиб ву.
Серенжем гъабхурайи зализ уьлкейин 20-диинакьан регионариан терроризмйин, экстремизмдин идеология терг апIбан ва милли хатIасузвалин машгьур экспертар, хусуси метлеб айи дявдин операцияйин иштиракчйир, диндин ва илимдин тешкилатарин вакилар, вузарин ва колледжарин студентар уч духьнайи.
Форумдин сабпи йигъан пленарный заседание кIули гъубшнийи. Душваъ Дагъустандин Правительствойин председателин заместитель Рамазан Жяфаров, РД-йин милли политикайин ва диндин ляхнариз лигру министрин вазифйир тамам апIурайи Урусатдин Игит Темирлан Абуталимов, Урусатдин Игит Мягьямад Баачилов ва гьацдар жарадар иштирак гъахьнийи.
Пленарный заседание ачмиш апIури, РД-йин Правительствойин Председателин заместитель Рамазан Жяфаров удучIвну гъулхнийи. Дугъу Республикайин кIулиъ айи Сергей Меликовдин форумдин иштиракчйириз вуйи тебрикнан кагъаз гъурхнийи. «Гъи ухьу гележегдиъ ихь жямяаьт терроризмйин хатIалувалихьан уьбхбан месэлйир сатIиди гьял апIуз уч духьнахьа. Гьаму форум важиблу сюгьбатар гъахуз мумкинвал туврайи майдан ву. Терроризм, тIуркIуваларси, даргъуваларси, инсанар йихубси, гъи думу интернетдиан, социальный сетариан инсанарин кIулиъ убчIврайи нягьякь идеологияра ву. Ухьу гьаддиз лайикь вуйи кьимат тувуз буржлу вухьа. Аьхиримжи кьюд-шубуд йисан террориствалин цIийи жюрйир арайиз удучIвна. Урусатдин душмнари жигьиларин фагьумдиз тясир апIбиинди жямяаьтлугъдин ва гьюкуматдин асул бина дабгъуз хъюгъна. Терроризмйин идеологияйи, сагъ апIуз даршлу уьзриси, варитIан зяиф ва назук йишвар агуру. Хусуси метлеб айи дявдин операция гъабхурайи гьамусдин вахтна жигьиларин ва набаллугъарин кIул илтIибкIуз рягьятди ву. Ихь метлеб, жигьилар чIуру идеологияйихьан ярхла апIуб, дурариз заан ери айи образование ва ужуб ляхин тувуб, чпиз айи мумкинвалар ишлетмиш апIуз рякъяр ачухъ апIуб вуйихь. Республикайин Правительствойи агьалйир, иллагьки жигьилар, гъаврикк ккаъбан ляхниз гизаф фикир тувра. РФ-дин миллетарин ляхнариз лигру Федеральный агентствойихъди, къанун уьбхру органарихъди, жямяаьтлугъдихъди сатIиди агьалйириз кучIлин мялуматар тувру рякъяр хъяркьра. Мялум вуйиганси, саб гъадагъа апIбан ляхниинди терроризмдиин гъалиб хьуз шулдар. Жигьилариз уьлкейин тарихдикан, гъийин игитарикан ктибтури, дурар ватанпервервалихъ хъаъну ккунду.
Диндин кIулиъ айидарихъди гъахру сюгьбатарин важиблуваликан пуз ккундузуз. Аьсрариан ухьухьна дуфнайи, албагну, чиб-чпиз гьюрмат апIбахъ хъаърайи ихь аьдати конфесйир дугъри идеологияйин чешне ву», – гъапнийи Рамазан Жяфаровди.
Пленарный заседаниейиъ Урусат-дин Игит Мягьямад Баачиловра удучIвну гъулхнийи. Дугъан улхуб, дугъу кIурайи гафарин дугъривал апIури, залиъ айидарин гарччлари швнубна саб ражари дебккнийи. Гьаддиз газатдин гъюру нумрайиъ дугъан улхуб хъайи-хъайиси тувдича.
Пленарный заседание ккудубкIбан кьяляхъ форумдин иштиракчйир чпин гъуллугънан вазифйир тамам апIури гъийиху къанун уьбхру органарин гъуллугъчйириз дивнайи ядигарихъ кюкйир дивуз гъушну.
Форумди чан ляхин давам апIура.
