Зубайдат Шябанова
Гьаму улихьна йигъари хусуси метлеб айи дявдин операцияйиъ иштирак шулайи эскрари Табасаран райондин глава Мягьямед Къурбановдин адресназ чухсагъул мялум апIури илтIикIурайи видеоролик хътапIну.
Хусуси метлеб айи операцияйин женгар гъягъюрайи йишваз Табасаран районди кми-кмиди рягьимлувалин кюмек хътапIура. Украинайиъ дявдин гьяракатар ккергъу садпи йигъариланмина райондиан урусатдин эскрариз саки 25 миллион манатдин мани палтар, ипIру сурсатар, сабпи нубатнаъди лазим шлу шей’ар ва хайлин жара мутмйир хътауз мумкинвал гъабхьну.
Мягьямед Къурбановди къайд гъапIганси, рягьимлувалин кюмек асас вуди райондин тешкилатарин, карханйирин, идарйирин, гьадму гьисабнаан администрацияйин ва меценатарин кюмекниинди гьязур ва уч апIура.
«Гьацира рягьимлувалин кюмекнак чпин пай ихь эскрарихьна вижнасуз дару ватандашарира кивра. Мициб ляхин хусуси метлеб айи дявдин операцияйиъ айи ва му кюмек гъадабгъурайи эскраризси, ухьузра важиблу вухьуз. Ухьхьан шлу кюмек апIувалиинди гъагъи шараитариъ ляхин гъабхурайи ихь эскрариз, дурарин фидакарвализ чухсагъул кIурахьа», – къайд гъапIнийи райондин главайи.
