Зубайдат Шябанова
Табасаран райондин ТIивкарин гъулан советдин администрацияйи РД-йин экономикайин артмиш’валин министерствойин 2024-пи йисаз вуйи «Ерли жягьтлувалар» конкурсдиз ТIивак гъулан Конторский кюче бинайиан рас апIбан проект адабгъну.

Думу проект тартиб апIбан асас месэлйир гъулан жямяаьтдихъди вуйи гюрюшдиъ гьял гъапIнийи. Гъулан жямяаьтди рякъюн важиблуваликан, думу чарасуз рас дапIну ккуниваликан, думу рякъюъ бицIидарин багъ, гъулан агьалйир ва хялар сейриз удучIвру гьарарин майдан ва административ дараматар ерлешмиш духьнайиваликан гъапнийи. Конторский кючейин саб кIулилан тмуну кIулиз саб километртIан артухъ манзил а, ва думу гъулан асас Центральный кючейик кабсра. Аьхъю йигъари, иллагьки кьюрдну инсанариз вуйи ва машинар хъаърудариз рякюъди гъягъюз читинди алабхъури шулу. Проект РД-йин экономикайин артмиш’валин министерствойин конкурсдиъ гъалиб гъабхьиш, Конторский кючейиъ расвалин ляхнар духну, дид’ин асфальтна бетон улубзиди.

«Колокольчик» бицIидарин багъдиз гъягъюрайидариз, сельсоветдиз гъюру ва гьарарин майдандиина удучIвру гъулан жямяаьтдиз му рякъ аьхю мяна айиб ву. Шлубкьан думу рякъ рас апIру чарйир агуз чалашмиш хьидихьа», – гъапну ТIивак гъулан глава Ибрагьим Гьяжиевди.
«Ерли жягьтлувалар» конкурс гъабхбан шартIариъ улупнайиганси, проектдиз финансар республикайинна муниципалин бюджетдин дакьатариан деетиди. Мидланра гъайри, харжарин саб пай чаина гъадабгъру меценатра чарасуз ади ккунду.
«Табасарандин нурар» газатдин редакция конкурсдиз дикъатлуди ккилигура. Натижйирикан, икибаштIан, учвузра мялумат тувдича.