Умгьанат Сулейманова
Ихь уьмриъ транспортди зурба йишв бисура. Диди, мяишатдин жюрбежюр цирклар автотранспортдихъди тямин апIувал ужу апIбахъди сабси, зигру гъагъарин кьадарра артухъ апIура. Хъа узуз гьаму макьалайиъ гъитIибкIуз ккунди айи месела жараб вуйиз. Дидиз саб гафниинди хатIасузвал пуз шулу.

Гьамусяаьт Дербент ва Дагъустандин Огни шагьрариъ, Дербент райондиъ хайлин хулар, дараматар дивра. Гъагъ зигру машинди фукьан гъагъ зигуруш, автобусдиъ швнур пассажир итну ккундуш, гьарсар шофериз ужуди аьгъя. Бязи пассажирар автобусдиъди чпиз лазим вуйи йишвахьна гъягъбан бадали сар-сарин кIул’ин дийигъузра разиди ву. Хъа бязи шоферари, жибдиз аьлава гъазанж гъафихъанмина, автобусдик гьял кмиди, думу хъапIуз гьяракат апIуру. Гьаз кIура ва гъапиш, жавабнан ерина къайд апIурза: аьхиримжи вахтари Дагъустандин Огни шагьриан лап Дербент шагьризкьан машинарин пробкйир шула. Думу рякъюн аьгьвалатназ гъилигу вахтна, улихь хьайидар гъагъ айи машинар ва ярхи фурйир вуйиб рябкъюру. Му кьюб жюре автотранспортди рякъюъ айи касариз машатвал апIура. Гьаз гъапиш шоферари чпин машинар дару кьадар гъагъ ивну, явашди хъаъра.

 
Дупну ккундуки, цци Дербент райондиъ гъагъ айи машинари бицIи машинариз манигъвал апIури, хайлин аварйир духьна. Дербент райондин ГАИ-йин кIулиъ айидари чпин вакиларикан, ляхниъ аьхю жавабдарвал гьисс апIури, дикъатлувал артухъ апIувал, рякъяриъ гьяракат апIру гьарсаб транспортдин дакьатарин ляхин ижми гюзчиваликкна гъадабгъувал тIалаб апIура. Анжагъ гьациб ляхин кIули гъубхиштIан, транспорт хатIасузди ишлетмиш апIбаъ заан хъуркьувал гъазанмиш апIуз шулдар.

 
Аьхиримжи йисари, иллагьки хусуси транспорт айидарин тахсирниинди хатIалу дюшюшарин кьадар артухъ шула. Цци Дербент райондиъ ички ишлетмиш дапIну транспорт либхури 37 кас гъидисну. Машинар хъаърайи дишагьлийирира рякъюн гьяракатариз манигъвалар апIура. Дураризра кади кIурахьа, транспортдин дакьат ишлетмиш апIурайи гьарсар кас, машиндин кьувватназ лигну ваъ, хъа рякъюн шараитар гьисабназ гъадагъну, гьяракат апIуз буржлу ву. Рякъярин гьялназ дилигди транспорт хъапIруган, аьхир харжиб шлуб транспорт либхурайири саб вахтнара кIваълан гьапIну ккундар. Рулихъ деънайидари рякъяриъ гьяракат апIбан къайдйир чIур апIбаз лигну, транспортдин дакьатар лихурайиган ички ишлетмиш апIбаз лигну, дурар транспорт либхбан ихтиярарихъ мягьрум дапIну ккун. Ички дубхъну рулихъ деънайи кас хатIалу вуйиб ухьуз варидариз аьгъяхьуз. Амма саспидари дициб фикир апIурдар. Хусуси машинар айи бязи касари, чпиз транспорт либхуз ихтияр тувнадаршра, думу либхуру.
Гизафдари ихтияр адарди транспортдин дакьатар лихура. Магьа Дербент шагьриъ цци хьадну кьюр-шубур йицIихьуд йис бегьем дару живанари, хулаъ айидариз хабар дарди машинар гьяятдиан адаъну, Дербент шагьрин кючйиригъ хайлин хатIалу дюшюшар арайиз гъахьну. Улихьган рякъярин къайда чIур апIурайидар ички дубхъну машин хъапIрайидар вуйи. Хъа гьамус, гъагъ айи аьхю машинари, фура машинари, дишагьлийири хъаъраайи машинари хайлин манигъвалар апIура. Рякъяриъ гьяракат апIурайи гьарсаб транспортдин дакьат фициб гьялнаъ аш, ахтармиш апIуз ГАИ- йин гъуллугъчйир хъуркьри адар. Дугъриданна, машинарин кьадар гизаф дубхьна. Дербент ва Дагъустандин Огни шагьрарин гъвалахъди гъябгъюрайи рякъ ккудудубкIкьан гагьди, рякъярин месэла гьял хьибдар.