Гюльнара Мягьямедова
Дагъустандиъ машинар гъягъру рякъяриъ кми-кмиди гъагъи аварйир шулу. Себеб саб ву – рякъюнна транспортдин гьяракатнан бязи иштиракчйири улупнайи къайдйир тамам дарапIрайивал.
2023-пи йисан 17-пи августдиъ гвачIнинган сяаьт йирхьубдиъ Къарабудагъкент райондиъ «Кавказ» машинар гъягъру федеральный рякъюн 848-пи километриъ 54 йисаъ айи касди хъапIрайи «Хонда» машин гъаншарди машинар гъюру рякъюн зулиз удубчIвну, думу рякъюъди гъюрайи гъагъ зигру фурайихъ хъубсну. ДТП-йин натижайиъ «Хонда» машин хъапIрайир ва думу машиндиъ айи шубур пассажир (Ахцигь райондиан вуйи 62 йисаъ айи жили жви, 56 ва 80 йисаъ айи дишагьлийир) али йишв’ин гъийихну.
Гьаму жюрейин гъагъи аварйир машинар гъягъру федеральный ря-къяриъ гизаф шулу. Хъа шагьрарин айитIра рякъяриъ машин хъапIрайирин дикъат яваш гъабхьиган, хатIалу дюшюшар цIиб арайиз гъюрадар.
Мягьячгъалайин аьтрафариин али Сулак поселокдиъ 44 йисаъ айи касди хъапIрайи машин рякълан ултIубччвну, газдин турбайихъ хъубсну. ДТП-йин натижайиъ гьадму машиндиъ айи Сулак поселокдиан, Бабаюрт ва Рутул районариан вуйи 16 йисан яшариъ айи 3 шураз зийнар гъахьну.
РД-йин МВД-йин мялуматарин дакьатди туврайи хабрариинди, Къизлариъ чан бабахьна хялужвди дуфнайи 12 йисаъ айи балихъ BMW машин хъубсну. ДТП-йин тахсиркар набалугъ бай, дугъан гьялаквал гъабхьну. Яягъди гъягъру инсанар рякълан улдучIвру йишвахьна дурушди, бай рякълан жаргъури улдучIвурайир вуйи. Натижайиъ бай, кIулин келлейиз зиян дубхьну, больницайиъ а.
Августдин 14-пи йигълан августдин 20-пи йигъаз, региондин Госавтоинспекцияйи мялуматариинди, Дагъустан Республикайин аьтрафариин рякъюнна машинарин гьяракатнан 38 дюшюш гьисабназ гъадагъна. Думу пашман дюшюшариъ 14 инсан гъийихну, гьадму гьисабнаан сар бицIир; 62 касдиз зийнар гъахьну, дурарикан 3 бицIидар ву.
Мектебариъ сабпи классарилан хъюгъну, Госавтоинспекцияйин гъуллугъчйири, мялимари рякъяриъ машинаринна яягъди гъягъру инсанарин гьяракатнан къайдйирикан дарсар кивуз хъюгъру. Хьадан вахтнаъ бицIидари рягьятвал гъадабгъурайи лагерариъра кмиди РД-йин ГИБДД-йин гъуллугъчйири профилактикайин серенжемар яваш апIурадар. Полицияйин вакилари бицIидариз рякъюн гьяракатнан лишнарикан, светофорин рангарин мянайикан ктибтуру, кючейиъди лицруган хатIасуз рякъ ктабгъну ккуниваликан сюгьбатар гъахуру. Сентябрин вазлиъ, бицIидар мектебдиз гъягъру вахт улубкьиган, вари уьлкейиъ «Дикъат йихьай – бицIидар» кIуру профилактикайин серенжемар ккергъди. Урхбан цIийи йис ккебгъу сабпи вазлиъ полицияйин вакилар бицIидарин багъариз, мектебариз, аьлава образованиейин центрариз бицIидарихъди сюгьбатар гъахуз гъягъюз хъюгъди.
Амма гьаци вушра, йислан-йисаз аварйириъ йихру инсанарин кьадар артухъ шула.
Машинар хъаърайи гьюрматлу ватанагьлийир! Рякъяриъ дикъат яваш мапIанай, рякъюн гьяракатнан къайдйир тамам апIинай. Яягъди рякъяриъди гъягъру инсанарира хатIасузваликан магьарханай. Машинар хъаърайидариин бегьемди хъугъвал дапIну ккундар, светофорин рангариз лигбан кьяляхъ, рякъюзра лигай.
