Гюльнара Мягьямедова
19-пи июнди Дагъустандин Глава Сергей Меликов Урусатди Украинайиъ гъабхурайи хусуси метлеб айи дявдин операцияйин иштиракчйирин хизанарихъди гюрюшмиш гъахьнийи. Республикайин кIулиъ айири Ватан бадали жан туву дявдин гъуллугъчйирин суратарин улихь кюкйир дивну, дурарихьна вуйи чан гьюрмат улупну. Дугъу правительствойин, депутатарин ва халис ватанагьлийирин терефнаан гъийиху эскрарин хизанариз башсагълугъвал ккун гъапIнийи.
«Жарарин дерднахьна вижнасузди лигурадархьа. Гьамрар аьхю гафарра дарихь. Ичв дерд ихь варидарин уьмуми дерд ву», – къайд гъапIнийи Сергей Меликовди. Дугъу гьацира гъийиху эскрарин хизанариз федеральный, региондин ва муниципальный дережйириъди улупнайи льготйирикан гъапнийи.
Гъийиху эскрарин хизанариз туврайи кюмекнакан хъайи-хъайиси РД-йин военный комиссар Даитбег Мустафаевди, РД-йин зегьметнан ва яшайишдин артмиш’валин министр Мурад Къазиевди, РД-йин Халкьдин Собраниейин комитетдин председателин заместитель, ихь региондин Саб вуйи Урусат дишагьлийирин гьяракатнан координатор Елена Ельниковайи мялуматар тувнийи.
«Вари муниципалитетариъ гъийиху эскрарин гьюрмат уьбхюра. Думу ляхин давам апIуб лазим ву. Пашманвалин ва гьюрмат уьбхбан йигъан (22-пи июнь) шагьрариъ ва районариъ дявдин гъуллугъчйирихьна вуйи ихь гьюрматра улупуб лазим ву. Думу ляхнарик кIваинди гъюбан багъ кивуб, гьюрматнан тахта кебхуб ккун апIури илтIикIдарин тIалабар тамам апIубра кабхъра. Гъит, гьадму хулариъ Ватан бадали жан туву игитар яшамиш шули гъахьиваликан варидариз мялум ибшри. Гьаму тIалаб вари муниципалитетарин кIулиъ айидарикан вуйиз», – гъапнийи Сергей Меликовди.
Гюрюшдиъ гъийиху эскрарин багахьлуйири региондин главайихьна, муниципалитетарин главйирихьна айи чпин суалар гъитIирккнийи. Думу вари месэлйир Дагъустандин главайи чан гюзчиваликкна гъадагъну.
22-пи июнди Дуствалин хулаъ «Хусуси метлеб айи дявдин операцияйин иштиракчйир – гьамусдин вахтнан игитар» ччвур тувнайи яркьу конференция кIули гъябгъиди. Думу конференция республикайин главайин табшуругъниинди тешкил дапIнайиб ву. Конференцияйиъ дявдин гъуллугъчйир ва дурарин хизанар иштирак хьиди. Душваъ гьюкуматди хусуси метлеб айи дявдин операцияйин иштиракчйириз туврайи кюмекнан месэлйириканра улхбанди ву.
