Зубайдат Шябанова
Гъубшу элгьет йигъан Табасаран райондин ТинитI ва ЧвулатI гъулариъ спортдин майднар ачмиш апIбан шадлугънан серенжемар кIули гъушнийи.
Къайд апIуб лазим вуки, думу спортдин майднар ТинитI гъулаъ «Газпромди – бицIидариз» социальный проектдин бинайиинди, хъа ЧвулатI гъулаъ – РД-йин гъулан мяишатдин ва ипIру-убхъру сурсатарин министерствойин гъуларин аьтрафарин уьмуми артмиш’валин гьюкуматдин программайин дахилнаъди арццуз мумкинвал гъабхьну.
Кьюбиб гъуларин агьалйир му шадлугънан мажлисдиъ тебрик апIуз дуфнайи хяларин арайиъ Табасаран райондин кIулиъ айи Мягьямед Къурбанов, РД-йин Халкьдин Собраниейиъ Дагъустандин главайин вакил Нюсрет Уьмаров, парламентдин депутат Алавудин Мирзабалаев, «Газпром межрегионгаз Мягьячгъала» тешкилатдин директор Ризван Мурадов, РД-йин гъулан мяишатдин ва ипIру-убхъру сурсатарин министр Мухтарбий Аджеков, РД-йин ариш-веришдин ва промышленностдин министр Низами Халилов ва жарадар айи.
«Гъи ухьу деврин вари тIалабариз жаваб шлу спортдин майдан абццрахьа. Мина спортдиин юкIв али ТинитI гъулан агьалйирси, багахь гъулариан вуйи жигьиларра гъиди. Му майдан ишлетмиш апIури, гьамусдихъантина спортдин жюрбежюр жюрйириан хайлин машгьур спортсменар тербияламиш апIуз шул кIури, умуд кивраза», – гъапну ТинитI гъулаъ мяракайиъ удучIвну улхури Мягьямед Къурбановди.
Гьелбетда, спортдин майдандиз ТинитI гъулан жямяаьт ухдитIан ккилигурайи. Думу райондин главайин ва гъулан жямяаьтлугъдин жягьтлувалиинди тикмиш апIуз ккунди швнуд-сад йис улихьна гьюкуматдин жюрбежюр программйирикра кипри гъахьнийи. Аьхирки, «Газпромди – бицIидариз» проектдик кипну, му ляхин тамам апIуз мумкинвал гъабхьну.
Акварра китIну, жилин зиълан табии дару укIан жар иливну айи майдандин 50х30 метр ву. Ккун гъабхьиган, душв’ин сабишв’инди кьюб майдандиин футбол, волейбол, баскетбол уйнамиш апIуз мумкинвал а. Сад йигъан душваз 100-тIан артухъ инсанарихьан гъюз шулу.
ТинитI гъулаъ спортдин майдандиин тупраз сабпи лик йивуб гьюрматлу хяларикан ккун гъапIну. Нюсрет Уьмаровди мини-футболин уйнамишар арццри, воротйириъ туп ипну, Алавудин Мирзабалаевди волейболин уйнамишариз, хъа Ризван Мурадовди баскетболиан талитариз рякъ абццну.
ЧвулатI гъулаъ спортдин майдан Мартин Сефербеговдин спортдин дараматдин гъвалахъ ачмиш гъапIну. Серенжемдиз ЧвулатI гъулан ва гъунши гъулариан машгьур спортсменар, мектебариъ урхурайидар дуфнайи.
Къайд апIуб лазим вуки, думу майдан тикмиш апIбан жягьтлувал машгьур спортсмен Мартин Сефербеговдинуб вуйиб саризра жиниб дар. Гъи, майдан абццбан кьяляхъ, дугъан кIван хиялар вари бегьем гъахьнуш гьедрерхди гъузуб дюз гъюрадайи.
«Узу гизаф шад вуза. Ич гъулаъ спортдин аьхю комплекс ачмиш апIуз планарик кайиз. Гьаму спортдин дараматдиинди ва майдандиинди ляхин дийибгъидар. Багарихьди шубариз художествойин гимнастикайиин машгъул хьуз мумкинвал шулу. Гележегдиъ теннисдин кортра абццуз гъайгъу зигурза. Гьелбетда, ужудар хиялар ва ниятар а кIури, кюмек дарди му ляхин арайиз хуз читинди ву. Мисалназ, ич гъулаъ гьаму майдан дивбаъ Ризван Мурадовди, Нюсрет Уьмаровди ва Мягьямед Къурбановди аьхю роль уйнамиш гъапIну. Дурариз вари гъулан жямяаьтди чугъсагъул кIура. Дюзди гъапиш, му майдан тикмиш апIуз узу юкьуд йис улихьна хъюгънийза. Сифте РД-йин экономикайин министерствойиз илтIикIнийза. Душван программйирик кипуз дархьиган, йиз кьувватариинди арайиз хуз хъюгънийза. Гьелбетда, сар касдихьан вари ляхнар апIуз ва харжар ахьуз удукьудайи. Шубубпи йисан РД-йин гъулан мяишатдин гъуларин аьтрафарин уьмуми артмиш’валин программайик кипуб ккун апIури илтIикIунза. Гъи, учвуз рябгъюрайиганси, ихь ватандашарин кюмекниинди му ляхин арайиз удубчIвну. Гьаму майдандиин райондин гъуларин ва кьибла районарин командйирин арайиъ мини футболиан, ич гъул’ан вуйи СВО-йиъ кечмиш гъахьи игит баярин гьюрмат уьбхбаз, гъулан йигъаз ва жара серенжемариз тялукь вуди талитар тешкил апIуз планарик кайич», – гъапну ич сюгьбатнаъ Мартин Сефербеговди.
Гьадму йигъан ЧвулатI гъулан спортдин цIийи майдандиин ЧвулатI, СиртIич ва Гюгьрягъ гъулариан 8 командайин арайиъ мини-футболиан талитар тешкил гъапIну. Хьуб команда ЧвулатI гъул’ан, кьюб СиртIич ва саб Гюгьрягъ гъул’ан вуйи. Гъалибчйириз ва 2-3-пи йишвар гъадагъдариз кубокар, медалар ва жара пешкешар тувну.
Кубокар ва призар ЧвулатI гъулан агьали Тимур Исмяиловди чахьан, хъа пешкешар гъадагъуз пулин фонд ГьепIил гъулан агьали Неби Небиевдин ва ЧвулатI гъулан бай Руслан Сефербеговдин терефнаан гъахьнийи.
Серенжемарин аьхириъ Мягьямед Къурбановди ТинитI ва ЧвулатI гъулариъ спортдин майднар тикмиш гъапIу ва тикилишчивалин ляхнар гъягъюрайи вахтна чпихьан шлу кюмек туву агьалйир гьюрматнан кагъзариинди лишанлу гъапIну.
