Наргиз Гюлечова
Улихьна йигъари Къурагь райондин Кумухъ гъулаъ 17 йис яшар духьну адру живанарин арайиъ шашкйириан турнир кIули гъубшну. Талитариъ Кьибла Дагъустандин, хъа асас вуди Дербент, Табасаран, Къурагь районариан спортсменар иштирак гъахьну. Табасаран райондиан вуйи вари 6 иштиракчи шашкйириан Урусатдин спортдин мастер Исмяил Исмяиловдин хиликк урхурайидар ву.
Талитариъ швейцарский къайдайиинди 7 тур уйнамиш гъапIну, ва Табасаран райондиан вуйи спортсменари вари гъалибнан йишвар гъадагъну. Ягъдигъарин 1-пи нумрайин мектебдиъ урхурайи 9 йисандин яшнаъ айи Мягьямед Гьясанбегов вари 7 турариъ гъалиб гъахьну. Кьюбпи йишван сагьиб гъахьирра Ягъдигъарин 1-пи нумрайин кьялан мектебдиъ урхурайи, 11 йисандин яшнаъ айи Альфия Ражабова ву. Дугъу турнириъ 5,5 балл гъазанмиш гъапIну. Хъа шубупи йишван сагьиб, 4,5 балл гъадагъну, Табасаран райондин гимназияйиъ урхурайи 9 йисандин яшнаъ айи Къязимягьямед Гьяжимурадов гъахьну. Къурагь райондин администрацияйи турнирин гъалибчйир грамотйирииндина медалариинди ва кьиматлу пешкешариинди лишанлу гъапIну.
Турнирин гьякьнаан чан фикрар Исмяил Исмяиловди «Табасарандин нурар» газатдиз ачухъ гъапIну.
«Турнириъ иштирак духьнайи вари спортсменарин арайиъ му спортдиан вуйи агъюваларин дережа Табасаран райондиан вуйи баяр-шубарин лап заануб гъабхьну. Фицики дурари саки гьар йигъан узу директорди лихурайи Кь.Мягьямедовдин ччвурнахъ хъайи искусствйирин мектебдиз гъюри, шашкйирианси, музыкайианра агъювалар гъадагъура.
Шашкйир ужуди уйнамиш апIбаан Табасаран район гьаммишан кIакIнаъ айиб ву. Улихьди райондиъ гизаф ужудар шашистар ади гъахьну. Гьамусяаьт аьгьвалат цIиб читинуб дубхьна. Мисал вуди гъадабгъиш, узухъди сабси жюрбежюр спортдин серенжемариз хъади гъягърур дихъури шулдарзуз. Гьаддиз гъюрайи наслин вакилар му спортдиин юкIв алди тербияламиш апIуз чалишмиш шулаза. Умудлу вуза, багарихьди му живанари, республикайинси, вари Урусатдин дережайиъдира заан хъуркьувалар гъазанмиш апIиди.
Му баяр-шубариз узу шашкйир улупуз хъюгъну думукьан вахт даршра, натижйир ужудар ву. Гъийин йигъаз республикайиъ шашкйириан мурартIан цIиб улихь хьайи 3 спортсментIан адар. Дурар Къизилюрт райондиан ву, ва дурарин му спортдиин машгъул духьну, кьюд йистIан дар. Умудлу вуза, 1-1,5 йисандин арайиъ ихь райондиан вуйи спортменар варитIан кIакIнаъ хьиди.
Хъа ухьу чакан улхурайи турнир хьайиз кьюд йигъ улихьна узу райондиан вуйи баяр-шубар Хасавюртдиъ кIули гъубшу шашкйириан вуйи серенжемдизра хъади гъушнийза. Гьадушваъра магьа гьаму Альфия Ражабова, республикайиъ варитIан кIубан спортсмен риш Ясмина Далгатовайиин гъалиб гъахьну. Думу турнириъ электронный жюрейиинди тупут ипбан судьяра узу вуйза.
Гумбет райондин Йирси Сивух кIуру гъулаъ гьар йисан шашкйириан вуйи турнир гъабхуз кюмек апIурайи сар кас а. Гьадму касдин пулин дакьатарихъ 10-пи августди гьадушваъ шашкйириан вуйи серенжем хьибди. Думу турнириъра судья узу вуза. Аммаки душваъ бицIидарин арайиъ талитариъ иштирак шлу спортсменар анжагъ чпин райондиан вуйидартIан дар. Хъа узуз, судья вушра, аьхюдарин арайиъ иштирак хьуз ихтияр азуз. Умуд кивраза гъалиб хьпиин», – аьлава гъапIну Исмяил Исмяиловди
